Təmsilçilərimiz avrokubokda növbəti görüşlərini keçirdilər.

“Neftçi” Finlandiyada meydana çıxdısa, “Qarabağ” AEL-i qonaq etdi. Hər iki qarşılaşmada hakimliklə bağlı diqqəti çəkən məqamlar oldu. Həmin məqamların şərhi üçün Əfqan Həmzəyevə müraciət etdik.

Qarabağ - AEL:[b] “Fikrimcə, estoniyalı hakimlər briqadası oyunun öhdəsindən gəlməyi bacardı. Tam layiqli olmasa da, bunun üçün çalışdılar. Amma yenə də onlarda beynəlxalq oyun təcrübəsinin azlığı hiss olunurdu. Bildiyimiz kimi, Estoniya Avropada futbol ölkəsi kimi tanınmır. Çempionatlarının, millilərinin zəif olması və bu günə kimi dünya səviyyəli ədalət təmsilçilərinin yoxluğu da artıq hakimin təcrübəsinin nə yerdə olduğundan xəbər verir. Bununla belə, o, çox çalışdı ki, oyunun “ip”ini əlində saxlasın. Tempi tutmağa çalışdığı hiss olunurdu. Amma komandalar bir az sürətli oynasaydılar, bunun hakimə fiziki cəhətdən problem yaradacağı görünürdü. Hakimin fiziki hazırlığının yüksək səviyyədə olduğunu düşünmürəm. Ola bilsin, havanın Estoniyaya nisbətən çox isti olması referinin müəyyən epizodlardan kənarda qalmasının əsas səbəbi idi. Bununla belə, onun verdiyi qərarların əksəriyyətində haqlı olduğunu düşünürəm. Amma ilk hissədə elə vəziyyətlər oldu ki, hakim onlardan uzaq qaldı. Məsələn, Şahruddinlə üzbəüz qalan AEL-in oyunçusu əli ilə oynamışdı və bunu görmədi. Bu epizodda qol olsaydı, çox böyük problem yaşanacaqdı. Digər bir nüans: oyunçular ikili mübarizələrdə kobud oynasalar da, hakimdən reaksiya görmədik. Mən belə hesab edirəm ki, köməkçiləri baş hakimdən daha yaxşı təsir bağışladılar. Qaldırdıqları bütün bayraqlar düzgün idi. Oyunun hakim-inspektoru olsaydım, baş hakimə 8,3, köməkçilərinə isə 8,4 verərdim. Bunu da əlavə etmək istərdim ki, qaydaların birmənalı yozumu var. Bir komandanın xeyrinə cərimə zərbəsini verirsənsə, eyni epizodda digərinin də xeyrinə verməlisən. Amma bu qaydanın pozulduğu hallar çox oldu. Məsələn, AEL-in xeyrinə verdiyini “Qarabağ”a vermirdi və ya əksinə. Göstərdiyi vərəqələrdə isə hakim haqlı idi. Düzdü, bəzi gecikən vərəqələr də oldu. Elə Ozobiçi götürək. Futbolçunun apardığı mübarizələr sırf top uğrunda deyildi. Demək olar ki, bütün epizodlarda qaydanı pozurdu. Onun vərqəsi gecikdi”.

HİK - Neftçi: “Dəniz Aytəkin illərin təcrübəsidi. Almaniya bundesliqası kimi bir yerdə fəaliyyət göstərir. Dünya, Avropa çempionatlarının mühüm qarşılaşmalarında hakimlik edib. UEFA-nın onu Avropa Liqasının təsnifat mərhələsinin oyununa təyin etməsi matçın yükünün böyük olduğunun sübutudu. Bilirik ki, Aytəkin Almaniyada vacib qarşılaşmalarda hakimlik edir. HİK – “Neftçi” oyununda gərgin mübarizə olacağı gözlənilirdi. Təəssüf ki, gözlənilənin əksinə bir qarşılaşma izlədik. Oyun çox rahat keçdiyinə görə də rahat da idarə olundu. Komandalar ona çətin anlar yaşatmadılar. Verdiyi bütün qərarlar haqlı idi. Bu qədər yüksək səviyyəli hakimin belə qarşılaşmada səhv etməsi də mümkün deyildi. Oyunun öhdəsindən layiqincə gəldiyini düşünürəm”.

SƏNƏM FƏRHADOVA