Prezident İlham Əliyev Yaponiyanın paytaxtı Tokioda keçirilən 32-ci Yay Olimpiya Oyunlarında Azərbaycan idmançıları və onların məşqçiləri üçün yüksək nəticələrə görə mükafatların müəyyən edilməsi haqda sərəncam imzalayıb.

“Football-plus.az” saytının məlumatına görə, ikinci yeri tutan hər bir idmançıya 200 min, onun məşqçisinə 100 min, üçüncü yeri tutan hər bir idmançıya 100 min, onun məşqçisinə 50 min manat mükafat veriləcək.

Nazirlər Kabinetinə bu sərəncamdan irəli gələn məsələləri həll etmək tapşırılıb.

Qeyd edək ki, Tokio Olimpiadasında qazancımız 7 medal olub. Karateçilər İrina Zaretska (+61 kq) ilə Rafael Ağayev (75 kq), sərbəst güləşçi Hacı Əliyev (65 kq) gümüş, cüdoçu İrina Kindzerska (+78 kq), boksçu Alfonso Dominges (81 kq), yunan-Roma güləşçisi Rafiq Hüseynov (77 kq) və qadın güləşçi Mariya Stadnik (50 kq) bürünc medala yiyələnib.