Azərbaycanlı mütəxəssis Səudiyyə Ərəbistanı klubunda
Futbolçularımız kimi, mütəxəsisslərimiz də ölkə xaricinə can atır. Onlardan biri də Ramiz Kərimovdu.
“Football-plus.az” saytının məlumatına görə, qapıçılar üzrə məşqçi yeni mövsümə Səudiyyə Ərəbistanında başlayacaq. Bunu nəzərə alıb, onunla danışdıq:
“Səudiyyə Ərəbistanında Küveytdə olduğu kimi idmanın inkişafına qayğı var. Dövlət tərəfindən böyük maliyyə ayrılır. Çalışacağım “Əl-Səfa” 2-ci divizionda çıxış edir. Burda 28 klub var. Çempionat 2 qrupa bölünüb. Yuxarı pillədə qərarlaşanlar 1-ci diviziona, ordan da yüksək liqaya vəsiqə qazanırlar. Ölkə böyük olduğuna görə oyunların keçiriləcəyi stadionlar arasında məsafə çoxdu, təyyarə ilə gedilir. Klubun şəraiti yüksək səviyyədədi. Stadion da, ot örtüyü də əla vəziyyətdədi. İlk məşqi dünən keçirdik. Burda mövsüm oktyabrda başlayıb, aprelə qədər davam edəcək. Bu müddət ərzində 26 oyun keçirəcəyik. Klubun baş məşqçisi və köməkçiləri tunislidi. Mənim vəzifəm qapıçıları yüksək səviyyədə hazırlayıb, komandanın daha üst liqalara çıxışına kömək etməkdi.
Kərimov keçidin necə baş tutduğunu da izah etdi:
“Əslində təsadüf nəticəsində alındı. Çalışdığım menecer var. O, nömrəmi klub rəhbərliyinə verib. Rəhbərlik özü mənimlə əlaqə saxladı. Pasportumu və məşqçilik kateqoriyamı istədilər. Səfər onlar tərəfindən həll olundu. Bilirsiz ki, Səudiyyə Ərəbistanına getmək üçün burdan viza almalısan. “Əl-Səfa” bu məsələni də qısa zamanda həll etdi və problemsiz şəkildə Səfva şəhərinə gəldim. Əslində əvvəl Küveytdə çalışdığım “Əl-Ərəbi”yə qayıtmaq imkanım var idi. Sadəcə, orda avqustdan məşqlər başlasa belə, əcnəbi məşqçiləri gətirməyə çətinlik çəkirlər. Pandemiyaya görə işçi vizası verilmir”.
SƏNƏM FƏRHADOVA
