Müdafiəni gücləndirmək istəyən ''Qalatasaray'' ''Tottenhem''in gənc üzvünə göz qoyub.

Fatih Terim bir neçə gün öncə jurnalistlərlə söhbətdə Kristian Luyindamanın yaxşı formada olmadığına işarə vurmuş və əcnəbi bir mərkəz müdafiəçisi alacaqlarını etiraf etmişdi. ''Sarı-qırmızılar'' Markaonun yanına cəld və sürətli bir müdafiəçi cəlb etmək istəyir. Çox güman həmin müdafiəçi Yafet Tanqanqa olacaq. Türkiyə mətbuatının yazdığına görə ''Cim-Bom'' 22 yaşlı bu futbolçunun birillik icarəyə götürülməsi ilə bağlı ''Tottenhem''lə anlaşma əldə edib. İstanbullular gənc oyunçuya illik 1,2 milyon avroluq maaş təklif ediblər. ''Qalatasaray'' mövsümün sonunda Tanqanqanı daimi əsasda transfer edə bilmək maddəsini də müqaviləyə saldırmaq istəyir. Bununla bağlı danışıqları qarşı tərəflə başqan Burak Elmas özü şəxsən aparır.

1999-cu il təvəllüdlü Yafet Tanqanqa konqoəsilli ingiltərəli müdafiəçidi. Əsas mövqeyi mərkəz olsa da, cinahlarda da oynamağı bacarır. Tanqanqa ''Tottenhem''in öz yetirməsidi və indiyə qədər başqa bir klubda çıxış etməyib. İngiltərənin bütün yaş qruplarından ibarət yığmalarında forma geymiş 184 sm boya malik futbolçu 2019/20-dən etibarən londonluların əsas komandasına cəlb olunmağa başlayıb. Ötən mövsüm ''Tottenhem''də 13 rəsmi oyun keçirən Tanqanqanın transfer dəyəri 8 milyon avro civarındadı. Bu il İngiltərənin U-21 komandasında 2 oyun keçirən futbolçu əsas yığmaya hələ ki dəvət almayıb.