Yeni mövsümə Bakıda hazırlaşan “Qəbələ” gündəlik məşqləri davam etdirir.

Klubun mətbuat katibi Anar Hacıdan əldə etdiymiz məlumata görə “qırmızı-qaralar” Stefan Vukçeviçin ardından ötən mövsüm komandanın şərəfini qoruyan daha bir legioneri geri qaytarıb. Söhbət Rafael Ultriqdən gedir. Braziliyalı forvard daha bir mövsüm bölgə təmsilçisinin uğurları üçün çalışacaq.

Bu yerdə onu da qeyd edək ki, yeni “futbol ili”ndə rafael “Qəbələ”nin yeganə “sambaçı”sı olmayacaq. Xatırlayırsızsa, ötən saylarımızın birində komandanın baş məşqçisi Elmar Baxşıyev daha bir braziliyalıdan xəbər gözlədiklərini bildirmişdi. Onun sözlərinə görə, müdafiçi mövqeyində çıxış edən futbolçu “Qəbələ”nin şərtlərini gözdən keçirib yaxın günlərdə cavabını verməliydi. Baş. Məşqçi açıqlamasında arxa xətt oyunçusunun adını çəkməsə də, braziliya mətbuatı “qırmızı-qaralar”ın maraq dairəsinə düşən arxa xətt oyunçusunun adını açıqlayıb. Bu Ruan Renatodu. Xəbərdə bildirilir ki, vətənində “Ponte Preta”dan yenicə ayrılan 27 yaşlı braziliyalı mərkəz müdafiəçisi 2021/22 mövsümündən “Qəbələ”nin formasını geyinəcək. 2017-ci ildə 6 ay Avstriyada legioner həyatı yaşamış Renatonun yeni klubuyla müqavilə bağlamaq üçün hətta dünən Azərbaycana yola düşdüyü də qeyd olunub.Onu da bildirək ki, Ruan “Ponte Preta”ya keçən ilin oktyabrında “Botafoqo”dan keçib. Avstriyada isə “Austriya”nın formasını geyinib.

Anar bəy Braziliya mediasında gedən xəbəri təsdiqlədi və Renatonun artıq Bakıda olduğunu bildirdi. Mətbuat katibi onu da vurğuladı ki, danışıqlar müsbət sonuclansa, bu gün onunla müqavilə imzalanacaq.
RƏŞAD