Özbəkistanlı futbolçu ''Roma''da!
''Roma''da özbəkistanlı futbolçu peyda olub. Söhbət Eldor Şomurodovdan gedir.
Joze Mourinyonun komandası ötən mövsüm ''Cenoa''da çıxış edən 26 yaşlı futbolçu ilə beşillik müqavilə imzalayıb. Bu transfer ''canavarlar''a 17,5 milyon avroya başa gəlib. Eldor yeni klubunda ''14'' nömrəli forma ilə çıxış edəcək.
Xatırladaq ki, Şomurodovun ulduzu Rusiya çempionatında parlamışdı. O, 2017-20-ci illərdə ''Rostov''un heyətində sərgilədiyi oyunla Avropa klublarının diqqətini cəlb etmiş və ötən yay 7,5 milyon avroya ''Cenoa''ya transfer olunmuşdu. Özbəkistan yığmasının üzvü Genuya klubunda 32 rəsmi oyuna çıxaraq 8 qol vurmuşdu. ''Cenoa'' böyük ehtimalla Şomurodovun boşluğunu ''Trabzonspor''lu Kaleb Ekubanla dolduracaq. Qanalının transferinin 2-3 milyon avroya bu həftə tamamlanacağı gözlənilir. Sonda xatırladaq ki, ''Roma'' Konfrans Liqasının pley-offunda ''Trabzonspor''a rəqib ola bilər. Bunun üçün qaradənizlilər 3-cü təsnifat mərhələsində ''Molde'' səddini aşmalıdı.
