Cənubi Kiprin 6 qat çempionu AEL-in əsası 1930-cu ildə qoyulub.

Klubun hazırkı prezidenti Andreas Sofokleusdu. İlk dəfə 1940/41 mövsümündə qızıl medallara sahib çıxan Limassol təmsilçisi sonuncu dəfə 2011/12 “futbol ili”ndə çempionluğu bayram edib. 91 yaşlı klub tarixi ərzində 2 dəfə gümüş, 7 dəfə bürünc medal qazanıb. Ölkə kubokunun 7 qat qalibi olan AEL 4 dəfə də Cənubi Kipr superkubokunu başı üzərinə qaldırıb. 2020/21 mövsümünü isə 3-cü pillədə başa vuraraq Konfrans Liqasında oynamaq hüququ qazanıb.

Limassollular avrokuboklarda 1968/69 “futbol ili”ndə debüt edib. Vətənlərində “şirlər” ləqəbi ilə tanınan komandanın qitəmiqyaslı turnirlərdə ən böyük uğuru 2012/13 “futbol ili”nə təsadüf edib. Həmin il Çempionlar Liqasına qatılan AEL 2-ci təsnifat mərhələsində “Linfild”i, üçüncüdə isə “Partizan”ı mübarizədən kənarlaşdıraraq qitənin ən mötəbər klub turnirində pley-offa yüksəlib. Bu mərhələdə onların yolunu “Anderlext” kəsib. Belçikalılar hər iki oyundan qalib ayrılmaqla AEL-in qrup mərhələsinə yüksəlməsinə imkan verməyib. 2017/18 mövsümündə isə “şirlər” Avropa Liqasında iki mərhələ adlayaraq 3-cü təsnifat mərhələsində Vyana “Austriya”sına məğlub olub.

Hazırda komandada 20 legioner var ki, bu da heyətin 60,6 faizini təşkil edir. 7 oyunçumilli üzvüdü. Kollektivdə orta yaş həddi 25,4-dü. Ev oyunlarını 13331 azarkeş tutumuna malik “Sirion Atletik” stadionunda keçirir. Məşhur “transfermarkt” portalının məlumatına inansaq, AEL-in hazırkı dəyəri 11,60 milyon avrodu. Komandanın ən bahalı oyunçusu bu yay “Genqam”dan gələn Brayan Peledi. Portalda onun transfer dəyəri 1 milyon avro göstərilib.
Komandanı Bosniya və Hersoqovinadan olan Duşan Kerkez çalışdırır. 45 yaşlı mütəxəssis karyerası ərzində AEL ilə yanaşı, Limassol təmsilçisinin gənclər komandasında da işləyib.

RƏŞAD