Superliqanın debütantı ''Adana Dəmirspor'' öz transferləri ilə nəinki Türkiyə, eləcə də Avropada adından söz etdirməkdə davam edir.

26 illik fasilədən sonra elitaya qayıdan Adana təmsilçisi bu yay artıq Yunes Belhanda, Mario Balotelli, Benjamin Stambuli kimi tanınmış futbolçuları transfer edib. Adanalılar uzun müddətdi daha bir dünya səviyyəli ulduz – David Luislə danışıqlar aparırlar.

Bu arada ünlü italiyalı jurnalist Nikola Skira öz ''tvitter'' səhifəsində tərəflərin artıq anlaşma əldə etdiklərini yazıb. Onun verdiyi məlumata görə debütant 34 yaşlı braziliyalı müdafiəçi ilə ikiillik müqavilə imzalayacaq. Luisin illik məvacibi isə 4 milyon avroya bərabər olacaq! Amma ''Adana Dəmirspor''un prezidenti Murat Sancak sosial şəbəkədəki paylaşımında bu faktı təkzib edərək bunları yazıb: ''David Luislə anlaşdığımız barədə çıxan xəbərlərin hamısı yalandı. Yetər artıq. Onunla anlaşmışıqsa, klub prezidenti kimi mənim niyə bundan xəbərim yoxdu?'' Bir müddət öncə başqan özü fanatlara müjdəli xəbəri çatdıraraq ''sambaçı'' ilə anlaşmağa yaxın olduqlarını demişdi. Xatırladaq ki, daha öncə ''Benfika'', ''Çelsi'' və PSJ kimi klubların şərəfini qorumuş ünlü futbolçu 2019-dan bu yana ''Arsenal''da top qovurdu. Amma London klubundan ayrılan Luis hazırda azad agent statusundadı. O, premyer-liqada ümumilikdə 213 oyuna çıxaraq 14 qol, 8 məhsuldar ötürməylə yadda qalıb. DÇ-2014-ün iştirakçısı olan bu futbolçu Braziliya yığmasında isə 56 oyuna çıxaraq 3 qol vurub.