UEFA-nın bayrağı altında keçirilən turnirlərdə 2020/21 mövsümünün ən baxımlı qolu müəyyənləşib.

Birinci yerə Çempionlar Liqasında qeydə alınan qol layiq bilinib.

“Portu”nun hücumçusu Mehdi Tareminin 1/4 finalın “Çelsi” ilə cavab matçında (1:0) vurduğu qol məlum nominasiyada ilk yeri tutub. İran yığmasının 29 yaşlı hücumçusu aprelin 13-də Sevilyada keçirilən oyunun son dəqiqələrində topu başı üzərindən aşırma zərbə ilə tora qovuşdurmuşdu. Bu qol 600 mindən çox azarkeş arasında keçirilən sorğuda təxminən 30 faiz səs toplayıb.

İkinci yeri italiyalı hücumçu Lorentso İnsinyenin AÇ-2020-nin 1/4 finalında Belçikaya (2:1) vurduğu qol tutub. Üçüncü yerə isə Avropa Liqasının qrup mərhələsində “Reyncers”in yarımmüdafiəçisi Kemar Rufun “Standard”la səfər oyununda (2:0) son nöqtəni qoyduğu qol layiq bilinib.