2019-cu ildə “Çelsi”dən böyük ümidlərlə “Real”a transfer olunan Eden Azarın İspaniya klubuna ciddi fayda verdiyini, çətin ki, kimsə iddia edər.

Madridlilərə 100 milyon avroya başa gələn belçikalı futbolçu ötən iki ildə dəfələrlə zədə alması və yaşıl meydana idealdan çox-çox uzaq formada çıxmasıyla yadda qalıb.

Onunla bağlı yayılan son xəbər də “Real”ın azarkeşlərini məyus edib. Artıq tətildən qayıdan Eden funksional hazırlığının yoxlanması məqsədi ilə tibbi müayinələrdən və müxtəlif testlərdən keçib. Yerli “AS” qəzetinin yaydığı xəbərə görə, yarımmüdafiəçinin testlərinin cavabları son dərəcə məyusedici olub. Yoxlanışdan sonra 30 yaşlı oyunçunun fiziki formasının çox zəif olduğu müəyyənləşib. Qeyd edək ki, Azar yeni mövsümə fərdi formada hazırlaşır. Klub belçikalı oyunçu üçün artıq fitness məşqçisi də ayırıb. Deyilənə görə, “Real”ın baş məşqçisi Karlo Ançelotti klub bahalı transfer etməyi planlaşdırmadığı üçün Edenə ümidini itirmir.