''Beşiktaş'' yeni mövsümdə ÇL-də oynayacağından heyətini mümkün qədər genişləndirmək istəyir.
Həm də yeni ''futbol ili''ndə legioner limiti qüvvədə olacağından son çempion əsasən yerli statusunda olan oyunçulara maraq göstərir. ''Qartal''ın maraq dairəsinə düşən oyunçulardan biri Xəlil Dərvişoğludu. Ötən mövsümün ikinci dövrəsini icarə əsasında ''Qalatasaray''da keçirən, sərgilədiyi inamlı oyunla Türkiyə yığmasına dəvət alan və hətta AÇ-yə də yollanan Xəlil müqaviləylə ''Brentford''a məxsusdu. Baş məşqçi Sərgən Yalçının tələbi ilə klub rəsmiləri ''Brentford''un idman direktoru Rasmus Ankersenlə əlaqə qurublar. İstanbul nəhəngi hətta öz skautlarını ''Brentford''la ''Uotford'' arasındakı yoxlama matçına da göndərib. ''Brentford''un 3:1 hesabıyla qalib gəldiyi oyunda qollardan birini məhz Xəlil vurub. Daha öncə ''Qalatasaray'' nə qədər çalışsa da 21 yaşlı bu futbolçunu yenidən icarəyə götürə bilməmişdi. ''Beşiktaş'' isə ÇL amilindən yararlanmaq istəyir. ''Ağ-qaralar'' ''Brentford'' rəsmilərini ''Xəlil ÇL-də uğurlu oynamaqla dəyərini daha da artıra bilər'' sözləriylə razı salmağa çalışır. Amma istanbulluların premyer-liqanın debütantına nə qədər pul təklif etməsi barədə məlumat verilmir.
Şübhəsiz ''Beşiktaş''ın Dərvişoğluya maraq göstərməsinin səbəblərindən biri həm də son dönəmlərdə ''Qalatasaray''la yaşanan ədavətdi. ''Cim-Bom'' bu yay ''Beşiktaş''ın ötən mövsümkü uğurunda böyük rol oynayan, amma müqaviləylə başqa klublara məxsus olan iki futbolçu - Valentin Rozye və Rəşid Gezzalı transfer etməyə çalışmaqla bu ədavətin əsasını qoymuşdu. ''Beşiktaş'' prezidenti Ahmet Nur Çəbi isə ''bundan sonra ''Qalatasaray''ın maraqlandığı bütün oyunçulara biz də maraq göstərəcəyik'' demiş və komanda bu baxımdan ilk addımını ''Benfika''lı Jedson Fernandeşi transfer etməyə cəhd göstərməklə atmışdı.
Xatırladaq ki, Fernandeş keçən mövsüm icarə əsasında ''Qalatasaray''da top qovmuşdu. ''Sarı-qırmızılar'' yenə də onu icarəyə götürməyə çalışır. İndi də ''Beşiktaş'' Xəlil Dərvişoğluya göz qoymaqla yenidən ''Qalatasaray''dan acıq çıxmağa çalışır.
