Avropa çempionatının final mərhələsinə hazırlığı davam etdirən qadınlardan ibarət voleybol millimiz son yoxlama oyununu keçirib.
“Futbol+”in məlumatına görə, Vüqar Əliyevin komandası Belarusa uduzub - 1:3 (18:25, 21:25, 22:25, 25:18). Təmsilçimiz ilk görüşdə də bu rəqibinə 0:4 hesabıyla yenilmişdi. Macarıstanla görüşlərdə isə tərəflər hərəyə bir qələbə qazanmışdı.
Beləliklə, Mingəçevir toplanışından sonra Bakıdakı hazırlıq mərhələsi də başa çatıb. Dünən isə voleybolçular Yunanıstana yollanıb. Yığma avqustun 16-dək bu ölkədə, həmçinin Macarıstan və Bosniya və Hersoqovinada hazırlıq keçəcək. Bu müddətdə yoxlama oyunlarının keçirilməsi də planlaşdırılıb.
Bolqarıstan, Rumıniya, Serbiya və Xorvatiyanin birgə evsahibliyi edəcəyi Avropa çempionatının final mərhələsi avqustun 18-də start götürəcək və sentyabrın 4-də yekunlaşacaq. Yarışda 24 komanda 4 qrupda mübarizə aparacaq. A qrupunda yer alan millinin rəqibləri ev sahibi Serbiya ilə yanaşı, Belçika, Rusiya, Fransa, Bosniya və Hersoqovina olacaq. Bu qrupun oyunları Belqradda keçiriləcək.
20 avqust
17.00 Azərbaycan - Belçika
21 avqust
18.00 Azərbaycan – Bosniya və Hersoqovina
22 avqust
17.00 Rusiya – Azərbaycan
24 avqust
20.00 Azərbaycan - Serbiya
25 avqust
17.00 Fransa – Azərbaycan