Tokio Yay Olimpiya Oyunları start götürsə də, bəzi idman növlərində mübarizə baş tutsa da, açılış mərasimi bu günə planlaşdırılıb.

Artıq olimpiya yığmamızın üzvləri də hissə-hissə “gündoğar ölkə”nin yolunu tutub. Məlum olduğu kimi, ölkəmiz dördilliyin ən nüfuzlu yarışında 44 idmançı ilə təmsil olunacaq. Onlardan 28-i kişi, 16-sı qadındı. Lisenziyaların sayı məlum səbəblərdən yetərincə azdı. Elə əvvəlki analoji yarışla müqayisədə medalların sayında da azalma gözlənilir. Təbii ki, əsas ümid yeri ənənəvi idman növlərində yer alanlar olacaq. Medal boxçamızın güləş, cüdo, boks və taekvondo üzrə yarışlardan dolacağına ümid edirik. Yəni məhz bu idman növlərində mübarizəyə qoşulacaq liderlərlər bayrağımızı qaldırıb, himnimizi səsləndirmək potensialına malikdilər. Əlbəttə, sensasiya da istisna olunmur. Amma belə ehtimal çox azdı. Ümumilikdə Tokio-2020-ni 7-8 medalla başa vursaq, papağımızı göyə tullaya bilərik. Elə “Gracenote” analitik şirkətinin əməkdaşları da təxminən bizim kimi düşünür. Onların fikrincə, olimpiya yığmamızın qazancı 7 (1 qızıl, 6 bürünc) medal olacaq. Mariya Stadnikin (güləş) çempion olacağı, İrina Zaretska, Rafael Ağayev (hər ikisi karate), Rüstəm Orucov, Zelim Kotsoyev (hər ikisi cüdo), Milad Beiqi Harçeqani (taekvondo) və Şərif Şərifovun (sərbəst güləş) 3-cü yeri tutacağı proqnozlaşdırılıb. Komandamızın bu nəticə ilə ümumi sıralamada 52-ci yeri tutacağı da qeyd olunub. “Gracenote”nin əməkdaşları bu qənaətə Rio-2016-dan sonra baş tutan beynəlxalq yarışların təhlilinə əsasən gəliblər. Amma inanmaq istərdik ki, olimpiyaçılarımız bu bədbin proqnozları alt-üst edəcək, idmansevərləri daha ciddi uğurlarla sevindərəcəklər.

Sonda təmsilçilərimizin müstəqillik dönəmində Yay Olimpiya Oyunlarında çıxışına diqqət yetirək. Qazanılan 7 qızıl, 11 gümüş və 24 bürünc medal 6 idman növünün payına düşür. Bunlar güləş (4 qızıl, 7 gümüş, 11 bürünc), cüdo (1 qızıl, 2 gümüş, 1 bürünc), atıcılıq (1 qızıl, 2 bürünc), taekvondo (1 qızıl, 2 bürünc), boks (1 gümüş, 7 bürünc) və avarçəkmədi (1 gümüş, 1 bürünc). Yunan-Roma güləşçisi Vitali Rəhimov 2008-də “gümüş”ə, ağırlıqqaldıran Valentin Xristov 2012- də “bürünc”ə yiyələnsə də, sonradan dopinqə görə medaldan məhrum olunublar.

Atalanta-1996 (23 idmançı - 1 gümüş)
Namiq Abdullayev (sərbəst güləş) – gümüş

Sidney-2000 (31 idmançı – 2 qızıl, 1 bürünc)
Zemfira Meftəhəddinova (stend atıcılığı), Namiq Abdullayev (sərbəst güləş) – qızıl, Vüqar Ələkbərov (boks) – bürünc
Afina-2004 (36 idmançı - 1 qızıl, 4 bürünc)

Fərid Mansurov (yunan-Roma güləşi) – qızıl, Fuad Aslanov, Ağası Məmmədov (hər ikisi boks), İradə Aşumova (25 m məsafəyə güllə atıcılığı), Zemfira Meftəhəddinova (stend atıcılığı) –bürünc

Pekin-2008 (44 idmançı - 1 qızıl, 1 gümüş, 4 bürünc)
Elnur Məmmədli (cüdo) – qızıl, Rövşən Bayramov (yunan-Roma güləşi) – gümüş, Şahin İmranov (boks), Mövlud Mirəliyev (cüdo), Mariya Stadnik (qadın güləşi), Xetaq Qazyumov (sərbəst güləş) – bürünc

London-2012 (53 idmançı - 2 qızıl, 2 gümüş, 5 bürünc)
Toğrul Əsgərov, Şərif Şərifov (hər ikisi sərbəst güləş) – qızıl, Rövşən Bayramov (yunan-Roma güləşi), Mariya Stadnik (qadın güləşi) – gümüş, Teymur Məmmədov, Məhəmmədrəsul Məcidov (hər ikisi boks), Xetaq Qazyumov (sərbəst güləş), Emin Əhmədov (yunan-Roma güləşi), Yuliya Ratkeviç (qadın güləşi) – bürünc

Rio de Janeyro-2016 (56 idmançı - 1 qızıl, 7 gümüş, 10 bürünc)
Radik İsayev (taekvondo) – qızıl, Lorenso Sotomayor (boks), Valentin Demyanenko (1200 m məsafəyə avarçəkmə), Rüstəm Orucov, Elmar Qasımov (hər ikisi cüdo), Toğrul Əsgərov, Xetaq Qazyumov (hər ikisi sərbəst güləş), Mariya Stadnik (qadın güləşi) – gümüş, Kamran Şahsuvarlı (boks), İnna Osipenko-Radomskaya (1200 m məsafəyə avarçəkmə), Milad Beiqi Harçeqani, Patimat Abakarova (hər ikisi taekvondo), Hacı Əliyev, Cəbrayıl Həsənov, Şərif Şərifov (hamısı sərbəst güləş), Rəsul Çunayev, Sabah Şəriəti (hər ikisi yunan-Roma güləşi), Natalya Sinişin (qadın güləşi) – bürünc.

KƏNAN HƏSƏNOV