Bir neçə gün əvvəl Lui van Qalın yenidən Niderland yığmasına qayıtmaq imkanının olduğu iddia edilmişdi.

Yerli mənbələr onun təyinatının zaman məsələsi olduğunu xəbər vermişdi. 69 yaşlı mütəxəssisin milli komandanın baş məşqçi vəzifəsinə əsas namizəd olduğunu iddia etmişdi. Buna əsas kimi Niderland Kral Futbol İttifaqının (NKFİ) nümayəndələrinin Van Qalla danışıq aparmaq məqsədilə Portuqaliyaya yollandıqları bildirilmişdi. Son xəbərlərdə tərəflərin razılığa gəldiyi qeyd edilir. Məlumata görə, onunla imzalanacaq müqavilənin müddəti 2022-ci ilin sonuna qədər nəzərdə tutulub. Van Qalın başçılıq edəcəyi məşqçi korpusuna Danni Blind, Frans Huk və Henk Freyzer daxil olacaq. Sonuncunun eyni zamanda yerli “Sparta”da baş məşqçi vəzifəsini icra edəcəyi də məlum olub. NKFİ rəhbərliyinin Freyzerin Qətərdə təşkil ediləcək DÇ-2022-nin final mərhələsindən sonra milli komandada Van Qalı əvəzləyəcəyini planlaşdırdığı da iddia edilir.

Xatırladaq ki, Frank de Bur Avropa çempionatının 1/8 finalında Çexiyaya məğlubiyyətdən (0:2) sonra istefaya göndərilib. Van Qala gəlincə, onun daha əvvəl iki dəfə - 2000-02-ci və 2012-14-cü illərdə ölkəsinin əsas komandasını çalışdırdığını qeyd edək. “Narıncılar”ı DÇ-2002-nin final mərhələsinə çıxara bilmədiyi üçün istefaya yollanan məşqçi 10 ildən sonra qayıtdığı yığmanı DÇ-2014-də bürünc mükafata çatdırıb.