İngiltərə yığmasının oyunçularının AÇ-2020-nin final mərhələsi boyunca hansı arzuolunmaz vəziyyətə düşdükləri çoxlarına məlumdu.

Qəribədi ki, komanda finala qədər irəliləsə də, turnir zamanı onların ünvanına sosial şəbəkələrdə 12500 təhqiramiz mesaj ünvanlanıb!..

Bu haqda “Daily Mail” qəzeti məlumat yayıb. “İnstaqram” və “tvitter”dəki mesajlar əsasən futbolçuların irqi və etnik mənsubiyyəti, cinsi orientasiyası ilə bağlı olub. Həmçinin onlar və ailə üzvləri hədələrə də məruz qalıb. “Crisp” analitik şirkətinin hesablamasına əsasən, mesajlar təxminən 10 min fərqli sosial şəbəkə hesabından yazılıb. Bu tip fikirlər AÇ-2020 zamanı ingilis futbolçularla bağlı sosial şəbəkədə yazılanların 3 faizini təşkil edib.

Yeri gəlmişkən, İngiltərə polisi İtaliya ilə final matçında (əsas və əlavə vaxtı 1:1 sona çatan oyundan sonrakı penalti seriyası italyanların 3:2 hesablı qələbəsi ilə nəticələnib) penaltini dəqiq yerinə yetirə bilməyən oyunçuları Markus Reşford, Ceydon Sanço və Bukayo Sakaya qarşı irqçi ifadələr işlədən 4 nəfəri həbs edib. Bu haqda “Sky Sports”a Böyük Britaniya polisi Konstabl Marks Roberts məlumat verib. O, adamlara qarşı irqçi ifadələrin işlədilməsinin yolverilməz olduğunu bildirib. Qeyd edək ki, bir neçə gün əvvəl Reşforda irqçi təhqir mesajları yazan 50 yaşlı kişinin də məsuliyyətə cəlb olunduğu açıqlanmışdı.