“Marsel” heyətini yeni futbolçularla gücləndirib. Liqa 1 təmsilçisi “Arsenal”dan Vilyam Saliba ilə Braziliya “Santos”undan Luan Peresi transfer edib.

20 yaşlı Saliba İngiltərə klubundan mövsümün sonuna kimi icarəyə götürülüb. Müqavilədə müdafiəçinin transfer hüquqlarının alınması nəzərdə tutulmur. Gənc futbolçu yeni komandasında “2” nömrəli formanı geyəcək. “Sent-Etyen”in yetirməsi olan Saliba 2019-cu ildən “Arsenal”dadı. O, geridə qalan mövsümü icarə əsasında Fransanın digər klubu “Nitsa”da keçirib. Fransız futbolçu ölkəsinin gənclərdən ibarət yığmasına da dəvət alır. Luan Peres isə birdəfəlik transfer olunub. Fransa klubunun bu keçidə görə “Santos”a nə qədər təzminat ödədiyi açıqlanmır. 26 yaşlı mərkəz müdafiəçisi yeni klubu ilə 4 illik müqaviləyə imza atıb.

Bu transferlərdən sonra “Marsel” öz yetirməsi olan 22 yaşlı müdafiəçi Lukas Perrini mövsümün sonuna qədər “Strasbur”a icarəyə göndərib. Amma “Strasbur” onun transfer hüququna da yiyələnə bilər.