"Real"ın prezidenti Florentino Pereslə bağlı qalmaqalın yeni təfərrüatları üzə çıxıb.

"Kral klubu" "El Confidencial" nəşrində Peresin səs yazılarının mövcudluğundan xəbərdar olub. 2011-ci ildə jurnalist Xose Antonio Abelyan paytaxt təmsilçisinin vitse-prezidenti ilə görüşərək, audioyazıları yaymamaqdan ötrü 10 milyon avro tələb edib. "Real" rəsmisi şantajçının şərtləri ilə razılaşmayıb.

Sonradan Abelyan səs yazılarını bir çox media orqanına, o cümlədən AS nəşrinə təklif edib. Lakin həmin KİV-lər etik məsələlər və məhkəmə araşdırmaları təhlükəsi üzündən imtina qərarı veriblər. Nəhayət, "El Confidencial" qalmaqallı sitatları dərc etməyə razılaşıb.

Qeyd edək ki, Florentino Peres səs yazılarında "Real"ın əfsanələri Raulla Kasilyası "klub tarixinin dahi fırıldaqçıları" adlandırıb, komandanın sabiq hücumçusu Kriştiano Ronaldonu və sabiq baş məşqçi Joze Mourinyonu təhqir edib.