“Red Bull” “Mersedes”i qayda pozuntusunda suçlayır
Mühəndislər kubokunda “Mersedes”i 44 xal qabaqlayan “Red Bull”un məsləhətçisi Helmut Marko belə hesab edir ki, “gümüşü qanadlar” nəzəri cəhətdən mümkün olduğu qədər titul uğrunda mübarizəni davam etdirəcək:
“Onlar növbəti mövsüm haqda düşünməklə yanaşı, öz bolidindən maksimumu almağa çalışacaq. “Mersedes” yalnız o halda təslim olur ki, titula nəzəri şansı da qalmasın”.
Marko həmçinin komandasının “Mersedes”də qayda pozuntusu aşkarladığını bildirib və Beynəlxalq Avtoidman Federasiyasından (FIA) məsələnin araşdırılmasını istəyib:
“Bizi nələrsə narahat edir, əlimizdə onların maşınında qanadın necə əyilməsinin videoyazısı var. FIA buna reaksiya verməlidi. Sorğu “Mersedes”dən gedirsə, çox tez reaksiya verirlər. Arxa qanad, mühərrik, təkərlərdə təzyiq – bizdə hər şeyi araşdırıblar. Bütün bu sorğular “Mersedes”dən bə ya “Mersedes” mühərriki ilə çalışan başqa komandalardan gedib”.
Xatırladaq ki, “Formula-1” üzrə dünya çempionatının iyulun 4-də keçirilən sonuncu mərhələsində “Red Bull”un pilotu Maks Ferstappen qələbə qazanıb, “Mersedes”dən Valtteri Bottas finişə 2-ci, “Maklaren”dən Lando Norris 3-cü çatıb. Mühəndislər kubokunda “Red Bull” 286 xalla liderdi, “Mersedes”in 242, “Maklaren”in 141 xalı var.
Yeri gəlmişkən, “Maklaren”in pilotu Lando Norris futbol üzrə Avropa çempionatının İngiltərə və İtaliya yığmaları arasında keçirilən final oyununda sonra “Uembli”də qarət olunub. “The Sun”ın yaydığı xəbərə görə, stadionun dayanacağında pilota hücum çəkən iki xuliqan onun 40 min funt sterlinq dəyərində olan saatını alıb.
Artıq “Maklaren”in mətbuat xidməti də hücum faktını təsdiqləyib:
“Maklaren” təsdiq edir ki, Lando Norris “Uembli”də keçirilən final oyunundan sonra insidentlə üzləşoib. Həmin vaxt onun saatı oğurlanıb. Lando zərər çəkməsə də, əlbəttə, təsirlənib. Komanda onu dəstəkləyir və biz əminik ki, fanatlar da Böyük Britaniya “Qran-pri”si ərəfəsində pilotumuza hər şeyin ən yaxşısını arzulayır. Polis hadisəni araşdırır, bu üzdən təfərrüatı bölüşə bilmərik”.
