Nadal və Federer getməyəcək, Cokoviç isə hələ düşünür
Rafael Nadalın ardından dünya tennisinin daha bir əfsanəsi – isveçrəli Rocer Federer də Tokio Olimpiadasında iştirak etməyəcəyini bildirib.
39 yaşlı tennisçi “instaqram” hesabında ot örtükdə oynamağın dizində ağrılara səbəb olduğunu yazıb:
“Çox məyusam, çünki hər dəfə İsveçrəni təmsil etmək mənim üçün şərəf və karyeramın parlaq hadisəsi olub”.
2008 Olimpiadasının qalibi yayda korta dönmək niyyəti ilə bərpa prosedurlarına başladığını da əlavə edib. Xatırladaq ki, Federer cari mövsümdə “Australian Open”i buraxıb və “Rolan Qarros”un gedişində diz problemi üzündən mübarizədən çəkilib.
Nadal və Federerin olmadığı istənilən turnirdə Novak Cokoviç qələbəyə bir addım yaxınlaşır. Ancaq serb tennisçi də koronavirusa görə Yaponiyada tətbiq olunan yeni məhdudlaşdırıcı tədbirlər üzündən Tokioya yollanmağa həvəsli deyil:
“Tribunada azarkeş olmayacağını öyrənmək xoş olmadı. Həmçinin xəbər tutdum ki, olimpiya kəndində idmançılar üçün çoxlu qadağa qoyulacaq, bəlkə də başqa yarışlara baş çəkə bilməyəcəyik. Mən hətta komandamda vacib rol oynayan stringeri də özümlə götürə bilməyəcəm. Komandaya götürə biləcəyim adamların sayına da məhdudiyyət qoyulub. Bu haqda düşünməliyəm. Olimpiadada iştirak həmişə planlarımın tərkib hissəsi olub, ancaq indi o qədər də əmin deyiləm. Son xəbərləri nəzərə alsaq, iştirak şansım 50-nin 50-yədi”.
Xatırladaq ki, iyulun 8-dən Tokioda tətbiq olunan fövqəladə vəziyyət rejimi avqustun 22-nə qədər qüvvədə olacaq. Olimpiada iyulun 23-də start götürəcək və avqustun 8-də başa çatacaq. Tennis turniri isə 24 iyul – 1 avqust aralığında olacaq.
Bu arada Nadal Cokoviçi “Uimbldon”dakı qələbə münasibəti ilə təbrik edib:
“Böyük dəbilqə”də 20 titul möhtəşəm uğurdu və artıq üç tennisçini birləşdirir. Səni və komandani bir daha bu münasibətlə təbrik edirəm”.
Bildiyiniz kimi, hazırda “böyük üçlük” adlandırılan Federer, Nadal və Cokoviçin hər birinin hesabında 20 “Böyük dəbilqə” titulu var. Yeri gəlmişkən, Cokoviç “Uimbldon”dakı qələbədən sonra ATP-nun Turində keçiriləcək ilin yekun turnirinə də vəsiqə qazanıb. İndiki reytinqə uyğun olaraq, “ATP Finals”a qatılmaq üçün tennisçilərə 6185 xal toplamaq lazımdı, serbin hesabında isə 7170 belə xal var.
