Deyəsən, Kriştiano Ronaldonun məsələsi aydınlaşmaq üzrədi.

Onun “Yuventus” ilə yeni müqavilə imzalayacağı xəbər verilib.

“La Gazzetta dello Sport” və “Sport Mediaset” nəşrlərinin yaydığı məlumatda portuqaliyalı hücumçunun adının “Mançester Yunayted” və PSJ ilə hallanmasına baxmayaraq, Turin klubunda qalmağa qərar verdiyi bildirilib. 36 yaşlı oyunçunun bu həftənin sonuna qədər “Yuventus”la 2022-ci ilin iyununda qüvvədən düşəcək müqaviləsinin müddətini bir il uzada biləcəyi vurğulanıb. Ronaldo Turin klubunda 2018-ci ildən oynayır.

Yeri gəlmişkən, “Yuventus”un keçmiş hücumçusu David Trezeqe Kriştiano haqda danışıb. “La Gazzetta dello Sport”a açıqlama verən fransalı portuqaliyalı hücumçunun komanda yoldaşları ilə bəzi problemlərinin olduğunu deyib:

“Kriştiano “Yuventus”un heç kimin gözləmədiyi ən yaxşı transferidi. Onun komanda yoldaşları ilə bağlı bəzi problemləri var idi, bunu görürdünüz, ancaq İtaliyaya gələndən sonra 100 qol vurdu. Fikrimcə, heç kim Zinəddin Zidan kimi onu idarə edə bilmədi. Bəlkə də hansısa məqamda “Yuventus”da anlaşılmazlıq var idi. Elə oyunçular var ki, onlarla yaxşı münasibət qurmaq daha yaxşıdı, çünki komandaya matçlarda qələbə qazandırırlar. Ronaldo da onlardan biridi, Dibala da”.