“Sabah” yeni mövsümün hazırlığına start verib. Komanda dünən “Bank Respublika Arena”nın əsas meydanında ilk məşqinə çıxıb.

Futbolçular müxtəlif fiziki təmrinləri yerinə yetiriblər. “Sabah”ın Bakı toplanışı iyulun 14-nə kimi davam edəcək. Ramin Quliyevin komandası toplanış çərçivəsində iyulun 9-da “Bank Respublika Arena”da “Zirə” ilə yoxlama oyununda qüvvəsini sınayacaq.

Masazır klubunun Gürcüstanda keçəcəyi təlim-məşq toplanışının da detalları bəllidi. "Tələbələr" iyulun 15-də Tiflisə yollanacaq. Onların hansı oteldə məskunlaşacağı da bilinir. Bu məlumatı klubun mətbuat xidmətinin rəhbəri Elnur Həmidovdan aldıq:

"Ayın 15-də Tiflisə yollanacağıq. Hansı nəqliyyat vasitəsi ilə gedəcəyimiz hələ bəlli deyil. Bu istiqamətdə işlər davam edir. Tiflisdə "Hualinq" otelində məskunlasacağıq. Hələ ki iki klubla yoxlama görüşü keçirmək üçün danışıq aparmışıq. "Saburtalo" və "Samqurali" ilə yoldaşlıq oyunları nəzərdə tutulub. Həmin qarşılaşmalarının tarixini yaxın günlərdə açıqlayacağıq".

Qeyd edək ki, “Sabah”ın yay hazırlığının ikinci mərhələsini əhatə edəcək Tiflis toplanışı iyulun 29-dək davam edəcək.

İLKİN SULTANLI