İdman
299
21.06.2021, 12:30
"Futzal çempionatına qatılmaq istəyənlərin sayı çoxdu" - RƏSMİ AÇIQLAMA
Futzal üzrə yüksək liqada yeni mövsümün start tarixi açıqlandı. Pandemiya üzündən uzun müddətdi təşkil olunmayan çempionat sentyabrın 9-da başlayacaq.
Yarış Operativ Qərargahın qərar və tələblərinə uyğun keçiriləcək. Həmçinin yalnız 18 yaşdan yuxarı şəxslər vaksin olunduğuna dair pasportu göstərməklə idman zalına daxil ola biləcək.
Yeni mövsümə hazırlığın necə getdiyini, iştirak edəcək komandaların sayını öyrənmək üçün Futzal Federasiyasının mətbuat xidmətinin rəhbəri Mahal Məmmədovla əlaqə saxladıq:
“Komandaların sayının dəqiqləşdirilməsi, yeni Əsasnamənin hazırlanması istiqamətində işlər gedir. Hazırda müraciət edən komandaların durumu dəyərləndirilir, müzakirə olunur. Çalışırıq elə komandaları seçək ki, həm çempionata rəqabət gətirsin, həm də mövsümün sonuna qədər mübarizə aparsın. 3-5 turdan sonra deməsin ki, iştirak etmirik. Müraciət edən komandalar az deyil, amma hamısını yarışa buraxmaq olmaz. Digər liqalarla bağlı işlərə isə iyulun 5-dən sonra başlanılacaq. Hələ ki prioritet yüksək liqadi. Daha sonra birinci və ikinci liqalarla bağlı məsələlər müzakirə olunacaq”.
Federasiya rəsmisindən yaşı 18-dən aşağı olan futzalçılarla bağlı məsələnin necə tənzimlənəcəyini də soruşduq:
“Operativ Qərargahın qərarına əsasən, hələ ki 18 yaşı tamam olan vətəndaşlar COVID-19 pasportu göstərmək şərti ilə idman zallarından istifadə edə bilərlər. Biz də buna əməl edəcəyik. Artıq oyunçuların vaksin vurdurması və bu pasporta sahib olması ilə bağlı məlumatlar əldə edirik. Son mövsümdə yüksək liqada 19 yaşadək bir oyunçunun iştirakı vacib sayılırdı. Yeni Əsasnamədə bununla bağlı tələbin olub-olmayacağı hələ müzakirə edilir. Yəni hər bir addımımızı Operativ Qərargahın tələb və tövsiyələrinə uyğunlaşdıracağıq”.
