Xəbər verdiyimiz kimi, iyulun 10-da keçiriləcək UFC 264 şousunun əsas döyüşü Konor Makqreqorla Dastin Porye arasında olacaq. UFC-nin iki çəki dərəcəsində sabiq çempionu olan irlandiyalı Porye ilə arasındakı 3-cü döyüşə hazırlıqla bağlı danışıb:

“Çox qəddar şəkildə hazırlaşıram. İndi gün ərzində ikinci məşqə çıxmaq ərəfəsindəyəm, əla formadayam. Onu ilk döyüşdə məğlub etsəm də, əvəzçıxma döyüşündə uduzmuşam. Aramızda trilogiya olacaq, nəyisə dəyişməliyəm. Özümə tam inanıram, hazırlığa köklənmişəm və motivasiyalıyam. İyulun 10-da cəhənnəm tamaşası quracam, buna şübhə etməyə bilərsiz. Hər şeyi səhvsiz edəcəm. Rəqib taktika hiyləgərliyi edəcək? Problem yoxdu. Vəhşini oyatmısız. Göylərin dəstək verdiyi vəhşini. Dua edin”.

UFC-nin iki çəki dərəcəsində sabiq çempionu Daniel Kormye Konora maraqlı məsləhət verib. Onun fikrincə, Konor Poryeyə uduzacağı təqdirdə Neyt Diasla döyüş üzərində düşünməlidi: “Neyt indi nəhəng ulduzdu. Son vaxtlar bütün başqa döyüşçülərlə müqayisədə inanılmaz təsir bağışlayır”.

UFC-nin yüngül çəkidə sabiq müvəqqəti çempionu Castin Qetji isə karyerasını bitirəcəyi ilə bağlı şayiələrə cavab verib. İş ondadı ki, bir neçə gün əvvəl sosial şəbəkələrdə Qetjinin sınaqçı-rəqibi Rayan Şarlebuanın hansısa fanatla yazışması yayılıb. Həmin yazışmada Şarlebua deyir ki, Qetji Xabib Nurmaqomedova uduzandan sonra psixoloji problemlət yaşayır və idmandan getmək haqda düşünür:

“UFC ona istədiyi döyüşləri vermir. İndi Castin təqaüdə çıxmaq haqda düşünür. Xabibə məğlubiyyət ondan çoxlu güc alıb. Məğlubiyyətdən sonrakı bir neçə ayı çətin keçirib”. Qetji şayiələrə belə cavab verib: “Bu uydurmadı. Karyeramı bitirməkdən çox uzağam. Düşünürəm ki, bu yazışmanı sosial şəbəkəyə qoyan saxtakarlığa əl atıb”.

Xatırladaq ki, 2020-nin payızında UFC 254 şousu çərçivəsində 2-ci raundda boğucu fəndlə Xabibə uduzan amerikalı həmin vaxtdan bəri heç bir döyüşə çıxmayıb.