Obradoviç 24 saata iki oyun keçirəcəklərindən narazıdı
21 yaşadək futbolçulardan ibarət milli komandanın üzvü Əmrə Kaplan yığmada oynamaqdan imtina edib. O, bu barədə "instaqram" hesabından yazıb: "Təşəkkürlər Azərbaycan. Azərbaycan millisinin formasını geydiyim üçün çox qürurlu və xoşbəxt idim. Üzərimdə əməyi olan bütün məşqçilərə, birlikdə tər tökdüyümüz komanda yoldaşlarıma minnətdaram. Dost və qardaş ölkənin gənclər komandasını tərk edərək bundan sonra ay-ulduzlu formanı tərlədəcəyimin həyəcanını və qürurunu yaşayıram”.
Nəzərinizə çatdıraq ki, Əmrə Kaplan həm U-19, həm də U-21-də 3 rəsmi oyunda iştirak edib. Müqavilə ilə “İstanbul BŞ”yə məxsus olan 20 yaşlı futbolçu icarə əsasında “Bodrumspor”da çıxış edir.
Müdafiəçinin bu addımına U-21-in baş məşqçisi Milan Obradoviçin reaksiyası necədi? 44 yaşlı serbiyalı mütəxəssis ona karyerasında uğurlar arzuladı: “Qeyri-adi nəsə baş verməyib. Əmrə Türkiyə Futbol Federasiyası ilə əlaqə saxlayaraq, onların 21 yaşlılardan ibarət yığmasında oynamaq istədiyini deyib. O, bununla bağlı ailəsi və meneceri ilə məsləhətləşib. Məsələdən xəbərdar olan kimi Əmrə ilə əlaqə saxladıq. O, mənə və məşqçilər heyətinə, komanda yoldaşlarına təşəkkürünü bildirdi. Türkiyənin U-21 millisində şans yarandığına görə belə seçim edib. İnsan kimi onu anlayıram. Futbolçu üçün daha yaxşı şans yaranıbsa, bunu başa düşmək lazımdı. Məşqçi olaraq isə üzgünəm. Həm futbolçu, həm də insan olaraq çox yaxşı biridi Əmrə. Seçmə mərhələ ərəfəsində belə futbolçunu itirmək yaxşı olmadı. Lakin bunları düşünüb pis olmaq lazım deyil. Bütün səmimiyyətimlə ona uğurlar arzuladım. Ümid edirəm ki, karyerasında istədiyi zirvəyə çatar. Gələcəyi haqda düşünmək onun hüququdu. Buna da hörmətlə yanaşmalıyıq”.
Obradoviç rəhbərlik etdiyi komandanın növbəti toplanışı haqda da danışdı. O, üzləşdiyi bəzi problemləri dilə gətirdi: “Mayın 19-da təlim-məşq toplanışımız start götürür. Bu gün heyəti təqdim edəcəm. 3 komanda ilə iki yoldaşlıq oyununda gücümüzü sınayacağıq. Mən indiyə kimi belə şey görməmişəm. Eyni gündə həm U-17, həm də U-16 ilə qarşılaşacağıq. Özü də 24 saat ərzində 2 oyuna çıxacağıq. Matçlardan biri saat 16.00-da, digəri isə ertəsi 15.00-da start götürəcək. Bəh (gülür)! Nələr baş verəcəyini görəcəyik. Həqiqətən də çox maraqlıdı. Buna görə də özümü xoşbəxt hiss etmirəm. Düzdü, bəzi futbolçular üçün özlərini göstərmək baxımından yaxşı oyunlar olacaq. Qarşıdan yay gəlir. Bu səbəbdən də yığma üçün yeni nəsil formalaşmalıdı. Yayda baş tutacaq təlim-məşq toplanışında bir çox suallara aydınlıq gələcək. Kimlər əsas komandada oynayacaq, kimlər heyətə düşməyəcək? Bunların hamısı cavabı vacib suallardı. Birinci divizion başa çatdı. Onların futbolçuları yaya kimi nə edəcəklər? Yeni mövsüm başlayana kimi gözləyəcəyik ki, bəzi məsələlər bəlli olsun. Bura kimin inkişaf etdiyi, kimin gerilədiyi daxildi. İndiki təlim-məşq toplanışında bu suallardan bəzilərinə aydınlıq gətirməyə çalışacam. Hazırda mənim üçün qapalı bir çox məsələlər var. Məhz bunları mütləq şəkildə aydınlaşdırmalıyam. Bundan sonra yığmanın əsas heyəti ilə bağlı məsələlərə aydınlıq gələcək”.
İLKİN SULTANLI
