Bugünlərdə futbolçuların hərbi xidmətiylə bağlı məsələ yenidən gündəmə gəlib. Daha doğrusu, mövzu Klublar Komitəsinin iclasında müzakirəyə çıxarılıb. Hərbi xidmət yaşına çatan futbolçular karyeralarını bitirmək təhlükəsiylə üz-üzə qalırlar. Bəs bu məsələ necə tənzimlənməlidi? Bu sualla milli komandaların məşqçilərinə müraciət etdik.
Arif Əsədov: “Bu elə yaş mərhələsinə təsadüf edir ki, futbolçular keçid dövründə olur. Kimsə əsgərliyini universitet təhsili aldığı üçün saxlaya bilir və o müddətdə futbolçu kimi karyerasını problemsiz davam etdirir. Universitet təhsili ala bilməyən, yaxud başqa səbəblərdən hərbi xidmətə getməyə məcbur olanlar isə əksər hallarda futbolçu karyerasını bitirir. Təbii ki, vətənə xidmət etmək hər kəsin borcudu. Lakin futbolçu üçün hərbi xidmət zamanı karyerasına verdiyi fasilə olduqca uzun müddətdi. Bu məsələ bizim dövrümüzdə də var idi. Mən SSRİ millisində oynayırdım. O vaxt ÇSKA və “Dinamo”ya yığmanın heyətində olan istedadlı futbolçuları məcburi cəlb edirdilər. Futbolçular orda həm karyeralarına davam edir, həm də hərbi xidmət keçirdilər. O zaman lazım olan balans da yaranırdı. Mən də həmin vaxt belə problemlə üzləşmişdim, hətta Minsk “Dinamo”su ilə müqavilə də bağlamışdım. Vaxt az olduğuna görə qısa zamanda sənədlərimi universitetə təqdim etdilər və təhsili aldığım üçün karyeramı davam etdirə bildim. Bunu da daha çox SSRİ yığmasının heyətində olduğuma görə etdilər. Həmin vaxt millinin heyətində olmasaydım, mən də hərbi xidmətə getməyə məcbur olacaqdım və böyük ehtimalla karyeram bitəcəkdi. Mütləq şəkildə bu məsələnin üzərində dayanmaq lazımdı ki, istedadlı futbolçular itib-batmasın. Necə həll edilməlidi, hansı variantlar var? Açığı, bilmirəm. Məncə, hərbi xidmət yaşına çatan futbolçulardan hansı milli səviyyəsindədisə, yaxud müvafiq yığmanın əsas üzvlərindəndisə, onlara güzəşt edilməlidi. Hərbi xidmətdə vətənin keşiyində dururuq, milli səviyyəsinə çatan futbolçular da ölkəni beynəlxalq səviyyədə təmsil edirlər. Məncə, bu nüans nəzərə alınmalıdı. Əlbəttə, o yaşa çatan bütün futbolçuların hərbi xidmətdən kənarda qalmasını nəzərdə tutmuram. Sadəcə, seçilən, istedadlı futbolçulara güzəşt olunmalıdı”.
Samir Əliyev: “Vətənə xidmət hər kəsin borcudu. Amma futbolçular bu xidmət müddətində formadan uzaq düşürlər. Xüsusilə o yaş peşəkar futbola keçid dövrü sayılır. Məncə, futbolçular hərbi xidməti MOİK-də keçməlidi. Bununla da həm ustalıq səviyyələrini qoruyub saxlaya, həm də artıra bilərlər. Biz oynadığımız vaxtda da oxşar sistem var idi. Həm hərbi xidməti çəkir, həm də futbol oynayırdıq. Eyni sistem indi bütün futbolçulara şamil olunmalıdı”.
AYGÜL