Sizin reklam burada

Bilbao təşkilatçılıq hüququnu itirdi

Title
Bilbao AÇ-2020-yə evsahibliyi edəcək şəhərlərin siyahısından çıxarılıb. Bu məlumatı Bilbao Şəhər Şurasının rəsmi saytı yayıb.
Məlumatda belə deyilir: “UEFA bizə birtərəfli qaydada “San Mames”i AÇ-2020-nin oyunlarını qəbul edəcək stadionların siyahısından çıxarmaq qərarına gəldiyini bildirib”. UEFA bu addımı İspaniya şəhərinin azarkeşlərin stadionlara buraxılacağı ilə bağlı təminat vermədiyi üçün atıb. “Marka” qəzetinin yazdığına görə, Bilbao bələdiyyəsi UEFA-nın qərarı ilə razılaşmır və müqavilənin şərtləri pozulduğu üçün bu təşkilatdan təzminat tələb etmək niyyətindədi.
Bilindiyi kimi, 2020-ci ildə keçirilməli olan Avropa çempionatı koronavirus pandemiyası səbəbindən bu ilə təxirə salınıb. 11 iyun - 11 iyul tarixlərində təşkil olunacaq nəhəng turnirə Bakı, Sankt-Peterburq, London, Münhen, Roma, Buxarest, Dublin, Kopenhagen, Qlazqo, Budapeşt və Amsterdam şəhərləri ev sahibliyi etməlidi. Lakin Münhen və Dublin də hələ ki qitə futbol qurumuna azarkeşlərlə bağlı təminat verməyib. Yeri gəlmişkən, UEFA-ya təminat verən Bakı A qrupunun üç və 1/4 finalın bir oyununu qəbul edəcək.
Son xəbərlərə görə, AÇ-2020-nin daha çox oyunu İngiltərədə keçiriləcək. “The Telegraph” nəşrinin məlumatında UEFA-nın İngiltərə Futbol Assosiasiyasının Avropa Superliqasına qarşı mübarizədə iştirakına görə təşəkkür olaraq bu qərarı qəbul edəcəyi bildirilir. “Uembli” stadionu D qrupunun oyunları ilə yanaşı, 1/8 finalın bir oyunu, yarımfinal matçları və finala evsahibliyi etməlidi. Londondakı arenanın yükü bir qədər də arta bilər. Belə ki, Bilbao artıq təşkilatçılıq hüququnu itirib. Müvafiq təminatı verə bilməyən Münhen (Almaniya) və Dublin (İrlandiya) də AÇ-2020-nin oyunlarını qəbul edəcək şəhərlərin siyahısından çıxarıla bilər. UEFA oyunlara azarkeş buraxılmasına görə təminat təqdim etməyən təşkilatçı şəhərlərə son olaraq aprelin 23-nə, yəni bu günə qədər vaxt verib.
Football-plus.az Məlumatlardan yararlandıqda istinad vacibdi. ✔ Məlumatlardan internet səhifələrində yararlanarkən müvafiq keçidin qoyulması vacibdi.