Sizin reklam burada

Rövşən Hüseynli zədələnib

Title
“Son görüş üçün də motivasiyamız var”
Slovakiya – Azərbaycan oyunundan sonra Rövşən Hüseynli Futzal Federasiyasının rəsmi saytına müsahibə verib. Milli komandanın qapıçısı qarşılaşmanı dəyərləndirməklə yanaşı, zədəsi və Yunanıstanla son oyun haqda da fikirlərini bölüşüb.
- Qrupun ən çətin oyununu oynadıq, demək olarmı?
- Demək olar. Bunun da səbəbi var. Bura dörd əsas oyunçumuz olmadan gəldik. Onlar zədəli olduğuna görə bizə kömək edə bilmirdi. Turnir cədvəlindəki vəziyyət həm də rəqibi mütləq qələbə üçün mübarizə aparmağa vadar edirdi. Rəqib meydanında oynamağımız da sözünü dedi. Fikir verin, Slovakiya yığması ilə Bakıdan kənarda keçirdiyimiz oyunlarda əsasən heç-heçə edirik.
- Səbəbini nədə görürsən?
- Əvvəlcə meydan amilini qeyd edərdim. Azarkeş olmasa da, örtüyə öyrəşmək lazımdı. Üstəlik, yol yorğunluğu da təsir göstərir.
- Buraxılan qol haqda nə deyə bilərsən?
- Bu komanda ilə Bakıdakı oyunda olduğu kimi, yenə müdafiədə səhvə yol verdik. Onlar da bundan istifadə etdilər. Əsas odu ki, intizamı sona qədər qoruduq və lazım olan nəticəni əldə etdik.
- Əslində sona yaxın yorğunluq aşkar hiss olunurdu. Belə məqamda qol vurcağımıza inanırdın?
- Bu gün uduzmayacağımızla bağlı sanki daxilimdə bir hiss var idi. Ona görə də inanırdım ki, hesabı bərabərləşdirəcəyik. Yəni vacib olan xal qazanmaq idi, onu da əldə etdik. Buna tək mən yox, komanda olaraq inanırdıq.
- Zədən nə yerdədi?
- Hələ ki ağrı yoxdu. Oyundan əvvəl ağrıkəsici vurdurmuşdum. İnşallah, ciddi bir zədə olmaz və Yunanıstanla oyunda meydana çıxaram.
- Bu heç-heçə Yunanıstanla qarşılaşma üçün yaxşı motivasiya ola bilərmi?
- Bakıda Slovakiyanı məğlub etdikdən sonra özünəinam artdı. Həmin qələbə bizə motivasiya verdi. Moldova ilə səfərdəki oyunda çoxlu səhvlər etdik. Bu gün bunu azaltdıq. Son görüş üçün də motivasiyamız var.
Football-plus.az Məlumatlardan yararlandıqda istinad vacibdi. ✔ Məlumatlardan internet səhifələrində yararlanarkən müvafiq keçidin qoyulması vacibdi.