AFFA dövlətin qərarını gözləyir

UEFA pandemiya dövründə azarkeşlərin stadionlara buraxılması ilə bağlı məhdudiyyəti ləğv edib. Qadağa bu ilin iyununda aradan qaldırılacaq.
Yeni qaydalara əsasən, görüşlərdə tamaşaçı sayı barədə qərar yerli hökumət tərəfindən qəbul olunacaq. UEFA prezidenti Aleksander Çeferin AÇ-2020-nin təşkili ilə bağlı daha bir açıqlama verib. "Sky Sports"a danışan sloveniyalı funksioner turnirin azarkeşlərlə keçiriləcəyini təsdiqləyib: "Təşkilatçılıqla bağlı bir neçə ssenari mövcuddu. İdeal ssenariyə əsasən Avropa çempionatını 12 şəhərdə keçirəcəyik. Amma mümkün olmasa, yarış 10 və ya 11 şəhərdə təşkil olunacaq. Bu, bir və ya bir neçə şəhərin tələb olunan şərtlərə cavab verməyəcəyi təqdirdə gerçəkləşəcək. AÇ-2020-nin heç bir matçının boş stadionda keçirilmək ehtimalı yoxdu. Hər bir şəhər fanatların tribunaya buraxılmasını təmin etməlidi. Şəhərlər üçün stadionlarda azarkeşlərlə bağlı son müddət aprelin 7-di. Yekun qərar isə aprelin 20-də veriləcək".
Turnirin keçiriləcəyi şəhərlərdən biri də Bakıdı. Azərbaycanın paytaxtı qrup mərhələsinin 3, 1/4 finalın 1 qarşılaşmasına evsahibliyi edəcək. Oyunların hamısı Bakı Olimpiya stadionunda keçiriləcək. Bəs ölkəmiz buna hazırdı? İyunun 1-nə kimi xüsusi karantin rejimi tətbiq olunub. UEFA da tələb edir ki, matçlara azarkeşlər buraxılsın. AFFA bunun üçün nə edəcək?
Problem sadə, həll yolu isə çətindi. AFFA-nın Mətbuat və İctimaiyyətlə Əlaqələr Departamentinin rəhbəri Firuz Abdulla ilə əlaqə saxlayaraq, məsələnin həlli istiqamətində hansı addımlar atıldığını öyrəndik. Qurum rəsmisi qısa açıqlama ilə kifayətləndi: “Bununla bağlı müvafiq qurumlarla müntəzəm müzakirələr aparılır. Yekun qərar olanda ictimaiyyətə məlumat verəcəyik”.
İLKİN SULTANLI