Keysuke Hondanın “Neftçi”yə keçidi dünya mediasının gündəmindədi. Transfer rəsmiləşəndən dərhal sonra həm Yaponiya, həm Rusiya, həm İtaliya, həm də Türkiyə mətbuatı keçidlə bağlı xəbərlər paylaşdılar. Dünyanın populyar mətbu orqanları Azərbaycan klubunun məşhur simanı heyətinə qatması ilə bağlı xəbərləri tirajladı.

Görəsən, 35 yaşlı futbolçudan müsahibə götürmək üçün dünyanın məşhur qəzet və ya saytlarından “Neftçi”yə müraciət olub? Klubun rəsmi kanalı Hondanı ictimaiyyətə maraqlı şəkildə təqdimı etdi. Hətta tibbi baxışdan keçməsini belə izləyicilərinə göstərdi. Bəs “Neftçi TV” Hondadan müsahibə götürməyi planlaşdırırmı?

Suallarımızı “ağ-qaralar”ın Marketinq, Media və İctimaiyyətlə Əlaqələr Departamentinin rəhbəri Rüstəm Allahverdiyevə ünvanladıq: “Zoom”dakı brifinqdə də gördüz ki, əcnəbi jurnalistlər futbolçumuza maraq göstərirlər. Dünyanın məşhur mətbu orqanları keçid haqda məlumat paylaşdılar. Hər gün xarici ölkə jurnalistləri bizə müraciət edirlər ki, Hondadan müsahibə götürək. Lakin yaponiyalı azı iki həftə ərzində heç kimlə danışmaq istəmir. Onun indi əsas istəyi komandaya tez uyğunlaşmaqdı. Lakin Honda keçidi ilə bağlı “Neftçi TV”yə danışıb. İsmayıl Abdullayev yaponiyalı ilə söhbətləşib. Tezliklə bu videosujeti kanalımızda izləyə biləyəcəksiz”.

“Neftçi” rəsmisi azarkeşlərə daha bir sevindirici xəbər verdi: “Sosial şəbəkələrdə ən çox müzakirə olunan məsələ futbolçunun formasının satılıb-satılmayacağıdı. Artıq fanatlarımız buna görə narahat olmasınlar. Hondanın formaları hazırdı. Bu gün-sabah satışa çıxarılacaq. Bundan sonra azarkeşlərimiz Hondanın formasını rahat əldə edə biləcəklər”.

İLKİN SULTANLI