Portuqaliya millisinin DÇ-2022-nin seçmə mərhələsi çərçivəsində Serbiya, Azərbaycan və Lüksemburqla keçirəcəyi oyunlar üçün heyəti açıqlanıb. Baş məşqçi Fernando Santuş 25 futbolçuya dəvət göndərib: qapıçılar - Entoni Lopeş (“Lion”, Fransa), Ruy Patrisio (“Vulverhempton”, İngiltərə), Ruy Silva ("Qranada", İspaniya); müdafiəçilər - Joao Kanselo ("Mançester Siti", İngiltərə), Sedrik Soareş ("Arsenal", İngiltərə), Dominquş Duarte ("Qranada", İspaniya), Pepe (Portu), Joze Fonte ("Lill", Fransa), Ruben Diaş ("Mançester Siti", İngiltərə), Rafael Gerreyro ("Borussiya", Dortmund/Almaniya), Nuno Mendeş (Sportinq); yarımmüdafiəçilər - Danilo Pereyra (PSJ, Fransa), Juan Palinya (Sportinq), Ruben Neves, Joao Moutinyo (hər ikisi "Vulverhempton", İngiltərə), Bruno Fernandeş ("Mançester Yunayted", İngiltərə), Renato Sanşes ("Lill", Fransa) Serjio Oliveyra (Portu), Bernardo Silva ("Mançester Siti", İngiltərə); hücumçular - Pedro Neto ("Vulverhempton", İngiltərə), Dioqo Jota ("Liverpul", İngiltərə), Kriştiano Ronaldo ("Yuventus", İtaliya), Rafa Silva (Benfika), Joao Feliş ("Atletiko", İspaniya), Andre Silva ("Ayntraxt", Almaniya).
Qeyd edək ki, Portuqaliya millimizlə martın 24-də İtaliyada qarşılaşacaq. Turindəki "Yuventus" stadionunda keçiriləcək matça Bakı vaxtı ilə saat 23.45-də start veriləcək. Bundan 3 gün sonra Belqradda Serbiya yığmasının qonağı olacaq Portuqaliya yığmasını martın 30-da Lüksemburqla da səfər oyunu gözləyir.
Bu arada Ruy Patrisio ciddi zədə alıb. “Vulverhempton”un 33 yaşlı qapıçısı premyer-liqanın 28-ci turunun “Liverpul”la ev oyununda (0:1) sıradan çıxıb. 86-cı dəqiqədə “Vulverhempton”un kapitanı Konor Kodi Məhəmməd Salahın zərbəsinin qarşısını almağa çalışarkən diziylə qapıçının başına zərbə vurub. Həkimlərin Patrisioya tibbi müdaxiləsi səbəbindən 14 dəqiqə fasilə yaranıb. Portuqaliyalı qapıçı sonda meydanı xərəkdə tərk edib.
Fernando Santuş mətbuat konfransı keçirib. Təcrübəli mütəxəssis qarşıdakı oyunlarla bağlı fikirlərini bölüşüb: “Karantin məsələsi həll olundu. İngiltərədəki oyunçuların milliyə gəlməsi üçün hansısa problem yoxdu. Mən hüquq üzrə mütəxəssis deyiləm, amma aydın görünür ki, futbolçular yığmaya gələ bilərlər. Seçmə mərhələdəki ilk üç oyunumuzun hamısı ölkə xaricində baş tutacaq. Təəssüf ki, ilk görüşə burda yox, İtaliyada çıxacağıq. Bizi qarşıda olduqca çətin oyunlar gözləyir. Bu, Avropa çempionatına gedən yol kimi asan olmayacaq. Xüsusilə startdakı 3 qarşılaşma həlledici olacaq. Çünki bu görüşlər mundiala vəsiqənin təməlini qoyacaq. Hazırda mənə aktual görünən yeganə məqam budu. Başqa alternativ variant görmürəm. Mayda Avropa çempionatının final mərhələsinə hazırlaşacağıq. Amma həmin turnirin seçmə mərhələ ilə heç bir əlaqəsi yoxdu. Düzdü, sıx qrafikdə oynamalı olacağıq. Amma bəhanə axtarmağın mənası yoxdu. Qarşıda 3 xal qazanmalı olduğumuz oyunlar var. Bunlar qrupdan çıxmaq üçün əsas matçlardı. Heyətdə yeni futbolçular olduğundan bütün diqqətimizi bir yerə cəmləməliyik".