Sizin reklam burada

Gəncəli azarkeşlər baş məşqçi və rəhbərlik ilə görüşəcək

Title
“Kəpəz”in layiq olduğu yerə divizion oyunlarını yola verə-verə gəlməsinin əleyhinəyəm”
Gəncə Azərbaycan futbolu üçün yaralı diyardı. Şəhərin əsas stadionunun yararsız vəziyyətdə olması da başqa bir dərddi. “Kəpəz”in uzun illərdi söz sahibi ola bilməməsi bir çoxlarını narahat edir. Gəncə Azərbaycanın futbol məbədi sayılır. Lakin bu şəhəri 1-ci divizionda təmsil edən komandanın nəticələri ürəkaçan deyil. Düzdü, qərblilər ölkə kubokunun 1/8 finalında “Sabah”ı mübarizədən kənarlaşdırdılar. Amma növbəti mərhələdə “Keşlə”yə qarşı heç nə edə bilmədilər desək, yanılmarıq. Gəncəlilər 1-ci diviziondakı nəticələri ilə azarkeşlərini üzürlər. Son turda əzəli rəqibi “Turan Tovuz”a məğlub olan “sarı-göylər” turnir cədvəlinin 6-cı pilləsində qərarlaşıb. Yaşar Vahabzadənin komandası 13 tur ərzində cəmi 16 xal toplayıb. Çempionatın sonunda lider “Turan Tovuz”a çatmaq müşkül məsələdi.
Bu durum gəncəliləri razı salırmı? “Kəpəz”in uğursuzluğuna azarkeşlərin reaksiyası necədi? Qənaətbəxş nəticə əldə etməyən komandalarının növbəti mövsüm premyer-liqada iştirakına razıdılarmı? Suallarımızı “Kəpəz”in fanklub rəhbərlərinə ünvanladıq. Həm “Xəmsə” azarkeş qrupunun idarə heyətinin üzvü Müşfiq Məmmədov, həm də rəsmi fanklubun rəhbəri Elmar Vəliyev hazırkı durumdan narahatdı.
Müşfiq Məmmədov: “Ardıcıl uğursuzluqların əsas səbəbi komandanın hansısa məlumat alıb, arxayınlaşması ola bilər. Halbuki bu, hazırkı durumun əksini göstərməliydi. Aldıqları məlumat onlar üçün stimul, özlərini yaxşı tərəfdən göstərmək üçün əsas olmalıydı. Ya da ki ölkə kubokunda “Sabah” üzərində qələbədən sonra futbolçular özləri haqda yüksək fikirlərə qapılıblar. Ölkə futbolunda anormallıq o səviyyədədi ki, adam bilmir komandanın növbəti mövsüm premyer-liqada mübarizə aparmasına sevinsin, ya yox. Düzü, “Kəpəz”in layiq olduğu yerə divizion oyunlarını yola verə-verə gəlməsinin əleyhinəyəm. Azarkeşini düşünənlər buna razı olmazdılar”.
Elmar Vəliyev: “Demək olar ki, “Kəpəz” azarkeşlərinin yaralı yerinə toxunduz. Klub rəhbərliyi və baş məşqçi narazıdısa, azarkeşlər də razı ola bilməzlər. Təbii, heç kim istəməz ki, “Kəpəz” bu durumda olsun. Buna nə rəhbərlik, nə də azarkeşlər razıdı. İnanıram ki, bu problem yaxın müddətdə həll olunacaq. Pis günün ömrü qısa olar. Belə bir deyim var ki, yaxın dost pis gündə tanınır. Məncə, bütün azarkeşlər komandanın maliyyə vəziyyətinin necə olduğunu bilir. Bu səbəbdən də onlar çox narazılıq etmirlər. İndi bir çox fanatlar mənə zəng vururlar ki, komanda niyə belə çıxış edir? “Kəpəz” azarkeşləri həmişə tələbkar olub. Komandamız rəqiblərə 2-3 top vuranda etiraz edirdilər ki, azdı. İndi komandanın məğlubiyyətlərini qəbul edə bilmirlər. Ən çox da mən. Düzdü, mən əslən tovuzluyam. Amma “Kəpəz”in bu komandaya uduzmasını həzm edə bilmirəm. Bir də “Neftçi”yə məğlub olanda dəli oluruq. Yəqin hər şey yaxşı olacaq. Rəhbərlik də, baş məşqçimiz də çalışır ki, məğlubiyyətlər olmasın. Klub üçün hər cür şərait qurulub, vaxtında oyunlara gedirlər. Azarkeşlər vəziyyəti başa düşməlidilər. Hamı bir olmalıdı ki, “Kəpəz”i bu vəziyyətdən çıxaraq. Biz nə Yaşar Vahabzadəyə, nə də Vidadi Rzayevə görə komandanı dəstəkləməliyik. Bizim üçün şəxslər vacib deyil. Azarkeşlər üçün əsas olan “Kəpəz”di. Bu səbəbdən də hamımız bir olmalıyıq. İndi də inanırıq ki, komanda “qara zolaqdan çıxacaq” və “Kəpəz” yüksək yerlərdə qərarlaşıb, premyer-liqaya vəsiqə qazancaq. Mən rəhbərliklə danışmışam ki, klub nümayəndələri və baş məşqçinin azarkeşlərlə görüşü olsun. Onlar da bunu qəbul ediblər. Bu yaxınlarda görüşümüz olacaq və azarkeşlərimiz rahat şəkildə etirazlarını dilə gətirəcəklər. Həm baş məşqçi, həm də rəhbərlik fanatların haqlı iradlarını dinləməyə razıdı. “Neftçi-2” ilə oyundan öncə bu istəyimiz baş tutacaq. Yenə deyirəm, pis günlərdə kimlərəsə görə yox, “Kəpəz” sevgisi üçün komandamıza dəstək olmalıyıq”.
İLKİN SULTANLI
Football-plus.az Məlumatlardan yararlandıqda istinad vacibdi. ✔ Məlumatlardan internet səhifələrində yararlanarkən müvafiq keçidin qoyulması vacibdi.