Sizin reklam burada

Honda “Neftçi”yə təklif olunub

Title
Yaponiya yığmasının sabiq futbolçusu Keysuke Honda “Neftçi”yə təklif olunub. Dünən bununla bağlı yayılan xəbərləri paytaxt təmsilçisinin mətbuat katibi Rüstəm Allahverdiyev də təsdiqlədi. Klub rəsmisi qəzetimizə açıqlamasında ulduz futbolçunun “Neftçi”yə meneceri tərəfindən təklif olunduğunu və hazırda tərəflər arasında danışıqlar getdiyini söylədi. Baş məşqçi Samir Abasov da təcrübəli futbolçunu komandada görməyin əleyhinə olmadığını rəhbərliyə çatdırıb.
34 yaşlı yarımmüdafiəçi karyerası ərzində “Naqoya” (Yaponiya), “Venlo” (Niderland), ÇSKA (Moskva/Rusiya), “Milan” (İtaliya), “Paçuka” (Meksika), “Melburn Viktori” (Avstraliya) və “Vitess” (Niderland) klublarının şərəfini qoruyub. 2020-ci ildə Braziliya “Botafoqo”sunda çıxış edən Honda 18 oyunda 2 qol vurub. ÇSKA-nın heyətində 2 dəfə ölkə çempionu olan, 1 dəfə ölkə kuboku və Superkubokunu qazanan yapon futbolçu “Milan”la 2016-cı ildə İtaliya Superkubokuna da yiyələnib. 2011-də millinin heyətində Asiya kubokunun qalibi olan Keysuke həmçinin dünya çempionatlarında ən çox qol (4) vuran yapon futbolçudu.
Football-plus.az Məlumatlardan yararlandıqda istinad vacibdi. ✔ Məlumatlardan internet səhifələrində yararlanarkən müvafiq keçidin qoyulması vacibdi.