AFFA “Neftçi”ni 4000 manat cərimələdi

“Sumqayıt” Əsasnamənin 9-cu bəndini pozub
Dünən AFFA İntizam Komitəsinin iclası keçirilib. Toplantıda Azərbaycan premyer-liqasının 18-ci, birinci divizionun 15-ci turunun oyunlarında qeydə alınan qayda pozuntuları müzakirə edilib, müvafiq qərarlar qəbul olunub.
“Neftçi” – “Sabah” oyununda işıqlandırma səbəbindən fasilələr yarandığına görə meydan sahibi klub 4000 manat cərimələnib.
“Sumqayıt” – “Zirə” görüşündə Əsasnamənin 9-cu bəndi (oyundan öncə, oyun vaxtı, oyundan sonra hakimlər briqadasının təhlükəsizliyini təmin etmək) pozulduğuna görə meydan sahibləri 800 manat ziyana düşüb.
Birinci diviziona gəlincə, “Keşlə-2” – “Zaqatala” matçında qonaqların 4 futbolçusu sarı vərəqə ilə cəzalanıb ki, buna görə klub 80 manat cərimə olunub. “Turan Tovuz” – “Kəpəz” qarşılaşmasında isə meydan sahibləri 4 futbolçusu sarı vərəqə ilə cəzalandığından eyni məbləğdə “tərləyəcək”.
“Neftçi-2” – “Qaradağ Lökbatan” oyununda Nazim Məmmədzadə ikinci sarı vərəqə alaraq meydandan kənarlaşdırıldığına görə 1 oyun cəzalanıb, “ağ-qaralar” 20 manat cərimələnib. “Neftçi-2”nin digər futbolçusu Əmrah Bayramov da ikinci “sarı”dan sonra meydandan qovulub ki, komitə ona və klubuna eyni sanksiya tətbiq edib. Qonaqlar isə sarı vərəqə alan 4 futbolçusuna görə 80 manat cərimə olunub.
Beləliklə, klublara ümumilikdə 5 min 80 manat cərimə kəsilib. Nəticədə mövsümün əvvəlindən cərimə sanksiyaları üzrə nəzərdə tutulan məbləğ 96 min 300 manata çatıb.