Eddi İsrafilov məhkəmənin qərarından məmnundu

Türkiyə çempionatının 1-ci liqasında 21-ci turun oyunları keçirilib. Yığmamızın yarımmüdafiəçisi Araz Abdullayevin formasını geydiyi “Boluspor” doğma meydanda “Girəsunspor”a 0:1 uduzub. Araz 65-ci dəqiqədə oyuna qoşulub. Hesabında 19 xal olan “Boluspor” 18 komandanın sıralamasında 15-ci pillədə qərarlaşıb.
Niderlandın 2-ci liqasında 24-cü turun görüşləri reallaşıb. Ozan Can Kökçünün şərəfini qoruduğu “Telstar” doğma meydanda “Breda”ya uduzub – 1:2. Oyuna start heyətində başlayan millinin yarımmüdafiəçisi 78-ci dəqiqədə əvəzlənib. “Telstar” 20 komanda arasında 33 xalla 9-cu yerdədi.
Legionerlərdən söz düşmüşkən, İspaniya "Albasete"sində çıxış edən Eddi İsrafilovun məhkəmədə bəraət aldığını xəbər vermişdik. Millinin 29 yaşlı yarımmüdafiəçisi son açıqlamasında günahsız olduğu sübuta yetirildikdən sonra futbola daha yaxşı kökləndiyini söyləyib: "Məhkəmədən sonra özümü yaxşı hiss edirəm. Artıq meydana daha sakit çıxır, nə etdiyimi bilirəm. Meydana çıxanda xoş olmayan sözlər eşidir, istəmədiyim hadisələrin şahidi olurdum. Əslində kənardan göründüyü qədər sakit deyildim. Bəraət alandan sonra isə vəziyyət dəyişdi. Burda baş məşqçinin mənə yanaşması, komandanın inamı və qazanılan nəticələr də müsbət rol oynadı. Artıq hər şey çox yaxşıdı".
Qeyd edək ki, 2016-cı ildə "Eybar"da çıxış edərkən sabiq komanda yoldaşları Serxio Enriç və Antonio Lunanın bir xanımla cinsi əlaqə videosunu yaymaqda suçlanan İsrafilov yanvarın 19-da bəraət alıb. Digər futbolçular isə 2 illiyə həbs olunub.