Yarışa qatılmaq üçün kifayət qədər komanda müraciət edib
Ötən sayımızda Futzal Federasiyasının milli komandanın Avropa çempionatının seçmə mərhələsində martda Moldova ilə qarşılaşacağı oyunlara qapalı məkanda hazırlaşması üçün Operativ Qərargaha müraciət etdiyini xəbər vermişdik. Qurum hələ ki məsələ ilə bağlı rəsmi qərarını açıqlamayıb. Ümumiyyətlə, futzal üzrə ölkə çempionatının başlaması milliyə daha faydalı olmazmı? Federasiya yığmanın zalda məşq etməsi üçün Operativ Qərargaha müraciət edə bilirsə, bunu çempionat üçün niyə etmir?
Suallarımızı Futzal Federasiyasının mətbuat xidmətinin rəhbəri Mahal Məmmədova ünvanladıq: “Çempionatla bağlı hansısa yenilik yoxdu. Biz bu gün milli komandanın məşq etməsi və UEFA bayrağı altında keçirilən yarışı təşkil etmək üçün rəsmi icazə alırıqsa, liqa barədə danışmaq hələ tezdi. Nə zaman Operativ Qərargan idman zallarından istifadəyə icazə verər, ondan sonra çempionatın keçirilməsi ilə bağlı məsələyə baxa bilərik. Bəli, bizə çempionatda iştirak etmək üçün kifayət qədər komanda müraciət edib. Hazırda onların siyahısı hazırlanır. Qərar verilən andan çempionatın təşkilati işlərinə başlaya bilərik. Lakin sırf turnirin keçirilməsi üçün Operativ Qərargaha müraciət etməmişik. Ölkədə idman zallarında bütün yarışların keçirilməsinə icazə verilmir. Bu vəziyyətdə Operativ Qərargaha futzal çempionatının keçirilməsi üçün müraciət etmək faydasızdı”.
İLKİN SULTANLI