Rüstəm Rəhimov: “Bunun üçün komissiya təşkil olunacaq”
AFFA İcraiyyə Komitəsinin yanvarın 29-da keçirilən iclasında bu ildən “Tofiq Bəhramov mükafatı”nın təsis ediləməsi ilə bağlı qərar qəbul olundu. Mükafat mövsüm ərzində özünü yaxşı tərəfdən göstərən ədalət təmsilçilərinə veriləcək.
Qərarda mükafatın təsis edildiyi bildirilsə də, onun mexanizmi haqda bilgi verilməyib. Bilinmir ki, mükafat hansı meyarlara əsasən təqdim olunacaq? Bundan başqa, dünya miqyasında tanınan referimizin adını daşıyan mükafata bir, yoxsa daha çox ədalət təmsilçisi layiq görüləcək?
Bu sualllara aydınlıq gətirmək üçün Veteranlar İttifaqının vitse-prezidenti, beynəlxalq dərəcəli hakim Rüstəm Rəhimovla əlaqə saxladıq: “Bildiyiniz kimi, dünyanın bir çox ölkəsində mövsüm ərzində özünü yaxşı tərəfədən göstərən hakimlər üçün xüsusi mükafatlar təsis olunub. Uzağa boylanmaq lazım deyil, elə Rusiyanı götürək. SSRİ dönəmində ən yaxşı hakimlər federasiyanın xüsusi mükafatına layiq görülürdü. Həmin ənənə bu gün də şimal qonşularımızda davam edir. Ən yaxşı futbolçunu, komandanı, baş məşqçini seçiriksə, hakimə də qiymət vermək lazımdı. Onlar da futbol ailəsinin bir üzvüdü, hakimsiz heç bir oyun keçirilmir. Mən hələ bir neçə il öncə belə mükafatın təsis olunmasının vacibliyini qeyd etmişdim. Gec də olsa, AFFA İcraiyyə Komitəsinin qərarı alqışalayiqdi”.
Rüstəm bəy mükafatın təsis olunduğunu bildirsə də, Nizamnaməsinin hazır olmadığını söylədi: “Bunun üçün komissiya təşkil olunacaq. Komissiya üzvlərinin neçə nəfərdən ibarət olacağı hələ müəyyənləşməyib. Yəqin ki, yaxın günlərdə bu məsələ də həllini tapar. Komissiyanın tərkibi məlum olandan sonra bir araya gəlinəcək və orda mükafatın hansı meyarlara əsasən veriləcəyi, bir və ya daha çox hakimə təqdim olunacağı müəyyənləşdiriləcək. Mən istərdim ki, “Tofiq Bəhrəmov mükafatı” ilə yanaşı, Anatoli Banişevskinin, Ələkbər Məmmədovun da adına mükafat təsis ediləydi. Onlar da Azərbaycan futbolunun tarixində parlaq iz qoyan şəxslər olub. Yəqin ki, gələcəkdə bu təklifimi də nəzərə alarlar”.
RƏŞAD