FİDE İddiaçılarin turnirini yekunlaşdırmaqda israrlıdı

FİDE apreldə İddiaçilarin turnirinin ikinci dövrəsini keçirməkdə israrlıdı. Başqa bir variant nəzərdən keçirilmir. Bunu Rusiya mətbuatına açıqlamasında ali şahmat qurumunun prezidenti Arkadi Dvorkoviç deyib: “Həmin müddətə kimi koronavirus epidemiyası ilə bağlı durumun daha da yaxşılaşacağına və yoluxma ehtimalının nəzərəçarpan dərəcədə azalacağına ümid edirik. Vaksinləşmə ilə bağlı qərar şahmatçılara məxsusdu: istəyə də bilərlər, istəməyə də. Bu məsələdə biz tərəfdən məcburiyyət yoxdu. Kimsə bu addımı atsa, bu da riskin azalması anlamına gələcək. Əminəm ki, yarış iştirakçılarının hamısı oynamaq istəyəcək və Rusiyaya gələcək. Ötən ilin payızında çinli qrossmeysterlərlə bağlı problem yaranmışdı. Bundan sonra Çin hökuməti ilə məsələni müzakirə etdik. Onlar bizi əmin etdilər ki, yerli şahmatçıların İddiaçıların turnirinə qatılması üçün bütün mümkün tədbirlər görüləcək”.
Qeyd edək ki, həmyerlimiz Teymur Rəcəbov məhz koronavirus pandemiyasına görə yarışın təxirə salınması xahişi ilə FİDE-yə müraciət etmişdi. Amma ali şahmat qurumu onun istəyini geri çevirdi və əvəzinə fransalı Maksim Vaşye-Laqrava dəvət göndərdi. Bununla belə, turniri başa çatdırmaq mümkün olmadı. FİDE sonradan Rəcəbovun könlünü alaraq, onun növbəti analoji yarışa dəvət olunacağını açıqladı. Onu da əlavə edək ki, hazırkı turnirin qalibi dünya şahmat tacı uğrunda görüşə vəsiqə qazanacaq. Norveçli Maqnus Karlsen noyabr-dekabrda təşkili planlaşdırılan həlledici dueldə rəqibini gözləyir.