“Çətinlikləri başa düşürük, amma doğma meydanda oynadığımızı da unutmamalıyıq”
Yanvarın 18-dən etibarən hazırlığı Bakı İdman Sarayında davam etdirən futzal millimiz 29-da Slovakiya ilə qarşılaşacaq. Toplanış və qarşıdakı oyunla bağlı komandanın baş məşqçisi Joze Alesio Da Silva federasiyanın rəsmi saytına müsahibə verib.
- Hazırlıq prosesi və futzalçıların durumu barədə məlumat verərdiz...
- Məşqlərimizi bu gündən şəhər və axşam olmaqla davam etdiririk. Qarşıda vaxtımız var, amma çox azdı. Uzun müddətdi oyun keçirmirik, bizə aid olan məkanda məşq etmirdik. Buna görə də texniki planda problemlərimiz var. Taktika ilə bağlı çalışmalarımızı çoxdandı davam etdiririk. Bu istiqamətdə ölkə xaricində çıxış edən futzalçılarımızda “axsama” ola bilər. Düzdü, onların əksəriyyəti həm ölkə çempionatında, həm də Çempionlar Liqasında oyunlar keçirirlər. Ancaq fərqli taktika ilə çıxış edirlər. Onlar oyundan 2-3 gün əvvəl gələcəklər və qısa müddətdə taktikamı mənimsəmələri çətin olacaq. Hazırda sərəncamımda olan oyunçuların bu baxımdan problem yaşamayacağını düşünürəm. Yenə deyirəm, burdakı futzalçılarla çoxdandı taktiki çalışmalar reallaşdırırıq. Ümumiləşdirsək, hələ ideal fomada deyilik. Amma fiziki və taktiki planda çalışırıq.
- 11 aydan çoxdu ölkəmizdə idman zallarının fəaliyyəti dayandırılıb. Oyunçuların bu müddətdə parket üzərində məşq etməməsi hiss olunurmu?
- Əlbəttə, hiss olunur. Biz yanvarın 18-nə qədər açıq yerlərdə məşq edirdik. Cəmi 5 gündü zala keçmişik. Bunu bir qədər də erkən etmək istəyirdik, amma zallar bağlı olduğuna görə mümkün olmadı. Milli komandaya verilən bu şansdan maksimum istifadə etməli, fasilə verməməliyik. Onsuz da kifayət qədər dincəlmişik, az məşq etmişik. İndi yaradılan şəraiti xeyrimizə çevirməliyik. Biz bu müddətdə rəsmi və ya qeyri-rəsmi oyun keçirmədik. Son 11 ayda cəmi bir dəfə - “Araz” Çempionlar Liqasının oyununda zala çıxdı. Oyun təcrübəsinin azlığı da problemdi.
- Özünüz də vaxtın az olduğunu dediz. Qalan günlər problemləri böyük ölçüdə həll etməyə çatacaqmı?
- Mümkün deyil. Futzalda hazırlıq üçün 1-2 həftə çox azdı. Bu müddət ərzində ideal forma yığa bilməzsən. Ancaq hər saniyə bizim üçün çox vacibdi. Hər keçdiyimiz məşq müsbət təsir göstərəcək. Yanvarın 27-si və 28-də isə gündəlik məşqlərin sayını ikidən birə endirəcəyik. Bununla həm yükləməni azaldacağıq, həm də “standartlar” üzərində işləyəcəyik.
- Ölkə xaricində çıxış edən futzalçılarla əlaqə saxlayırsızmı?
- Mütəmadi danışırıq. Eduardonun yüngül zədəsi var idi. Artıq məşqlərə başlayıb. Klubu ilə Türkiyədə toplanışdadı və iki oyun keçiriblər. Fiziki baxımdan tam hazır deyil. Tyaqonun da müəyyən çatışmazlığı var. O, son 10 gündə özünə komanda tapdı. Bosniya və Hersoqovina təmsilçisinin heyətində Çempionlar Liqasının oyununa çıxdı və qol da vurdu. Ancaq Kardoso və Rafael yaxşı formadadı. Vassuraya isə Bakıya gələndə baxacağıq. Hazırda Dubaydadı və ordakı klubların birinə keçib.
- Zədəli və başqa problemi olan futzalçı varmı?
- İsa Atayevin yüngül zədəsi var, amma oyuna qədər düzələcək. Əsas problemimiz oyunçuların fiziki baxımdan ideal formada olmamasıdı.
- Slovakiya ilə bağlı hansı məlumatları əldə etmisiz?
- Çox çətin, ağır oyun olacaq. Son 3 ildə bu komanda ilə tez-tez qarşılaşmışıq. Onlar bizi, biz də onları yaxşı tanıyırıq, oyun üslubuna bələdik. Amma hazırkı məqamda Slovakiya üçün müsbət məqamlar var. Belə ki, Slovakiyada ölkə çempionatı davam edir, milli səviyyəsində bir neçə yoldaşlıq oyunları keçiriblər. Komanda şəklində hər gün məşq edirlər.
- Sadaladıqlarınız faktlardı, amma final mərhələsinə yollanmaq baxımından ilk oyunda qələbə qazanmaq vacibdi...
- Əlbəttə, mütləq qələbə qazanmalıyıq. Oyunçularla da fərdi söhbətlər zamanı bizim üçün çox vacib oyun olduğunu, qələbə qazanmağa borclu olduğumuzu deyirəm. Çətinlikləri başa düşürük, amma doğma meydanda oynadığımızı da unutmamalıyıq. Təəssüf ki, Bakıda milli komanda ilk dəfə azarkeşlərsiz oynayacaq. Bunun da səbəbini hamımız başa düşürük. İnsan saglamlığı ön planda dayanır. Çalışmalıyıq ki, nəticəmizlə bizi ekran qarşısında izləyəcək azarkeşləri sevindirək.
- Siz hər zaman taktiki gedişlərlə rəqibə xoş olmayan sürprizlər etmisiz. Bu dəfə də sürpriz tapşırıqlar olacaq?
- İstənilən taktiki tapşırığı reallaşdırmaq üçün məşqlərdə çox çalışmalısan. Üstəlik, legioner həyatı yaşayan oyunçular da gəldikdən sonra onların durumunu yerində görməliyəm. Ona görə də bu dəfə sürpriz mümkün olmayacaq. Çünki vaxtımız azdı. Ancaq “sandıqca”mda sürprizlər var və növbəti oyunlarda istifadə edəcəyik.

Yeri gəlmişkən...
Millinin heyətinə yeni oyunçu dəvət olunub. Qapıçı Cavad Məmmədov ilk dəfə yığmanın düşərgəsinə qovuşub. 20 yaşlı qolkiper “Neftçi” İSM-in üzvüdü.