Təlim-məşq toplanışını davam etdirən futzal yığmamız Bakı İdman Sarayında gündə iki məşqə çıxır. Karyerasını ölkə xaricində davam etdirən futzalçılar komandaya dünən qoşulub. Yalnız zədəli İsa Atayev fərdi çalışmalarla kifayətlənir. Hücumçu tezliklə komandaya qoşulacağını, oyuna hazır olacağını deyib: “Zədə üzündən fərdi qaydada məşq edirəm. İki gündən sonra komanda ilə birgə çalışmalara qoşulacam. Həkim oyuna qədər tam hazır olacağımı deyib. Özüm də bu qarşılaşmalarda meydana çıxmağı, komandama kömək etməyi çox istəyirəm”.
Təcrübəli futzalçı vaxt azlığının və ilk gündən tam heyətlə məşq etməməyin çətinlik yaradacağını düşünür: “Baş məşqçi də artıq komandanın yanındadı. Plan üzrə çalışmalar davam edir. Əlbəttə, tam formaya düşmək, oyuna istədiyimiz kimi hazır olmaq üçün vaxtımız azdı. İndi yaradılan imkandan mümkün qədər istifadə edirik. Komanda olaraq hələ tam yığışmamışıq. Başqa klublarda çıxış edən oyunçularımız milliyə qoşulmayıb. Heyətin bütün üzvləri ilk gündən bir yerdə olsaydı, yəqin ki, effekt daha yüksək olardı”.
Rəqibləri də dəyərləndirən 32 yaşlı hücumçu qrupu lider kimi başa vuracaqlarına şübhə etmir: “Qrupa Slovakiya ilə duellə start verəcəyik. Reytinq cədvəlinə uyğun fikir bildirsək, favorit millimizdi. Slovakiya bu yolda əsas rəqibimizdi. Moldovanı da kiçiltmək olmaz. Yunanıstana gəlincə, bu komanda ilkin mərhələdən mübarizəyə başlayıb və pley-offda Türkiyə millisini səfərdə vurduğu qolların yaratdığı üstünlük sayəsində mübarizədən kənarlaşdırıb. Onlar nə Slovakiyadı, nə də Moldova. Təbii ki, məqsədimiz final mərhələsinə yüksəlməkdi. Bunun üçün də yaxşı start göturməliyik. Slovakiya ilə son 2 ildə iki dəfə qarşılaşmışıq. Çətin rəqibdi, amma udmaq mümkündü. Məncə, qrup mərhələsini lider kimi başa vuracağıq və məqsədə çatacağıq”.
Atayev yeni format haqda isə bunları söyləyib: “İlk dəfə qrup mərhələsi ev-səfər sistemi ilə keçiriləcək. Bu format daha maraqlı olacaq. Çünki hər bir rəqiblə iki oyun keçirəcəksən. Təəssüf ki, pandemiya üzündən oyunlar azarkeşsiz keçirilir. Ancaq gələcəkdə bu sistem azarkeşlər üçün də maraqlı olacaq. Artıq hər kəs millini doğma meydanda da izləmək imkanı qazanacaq”.