Sizin reklam burada

Tarakanov Türkiyədəki hazırlıqdan məmnundu

Title
Tarakanov Türkiyədəki hazırlıqdan məmnundu

Yunan-Roma güləşi yığmamız İstanbulun Sarıyer bölgəsində yerləşən Mersinli Ahmet adına təlim-məşq mərkəzində hazırlığı davam etdirir.

Vaxtilə Türkiyədə çalışan yığmanın baş məşqçisi Aleksandr Tarakanov “Anadolu” agentliyinə açıqlamasında yaradılan şəraitdən mənunluğunu ifadə edib:

“Güclü komanda olan Türkiyə ilə birgə təlim-məşq toplanışı keçirik. Bundan çox məmnunuq. Türkiyə millisinin çox yaxşı güləşçiləri var. Onlarla məşqlərdə çatışmazlıqları və səhvləri görürük. Türkiyə ilə Azərbaycan dost və qardaş ölkələrdi. İki qardaş dövlətin milliləri birlikdə hazırlıq keçir. Burda özümüzü əcnəbi kimi hiss etmirik. Türkiyə ilə Azərbaycanı bir-birindən ayırmaq olmaz. Əl-ələ verib uğurlu nəticələrə çalışacağıq. Federasiyamıza minnətdarlığımızı bildirirəm. Yaxşı şərait yaradıblar. Qardaş ölkədə hazırlaşmağımıza dəstək verdilər. Avropa və dünya çempionatlarından öncə də Türkiyə yığması ilə birlikdə çalışmaq istəyirik. Bizə yaradılan şəraitə görə Türkiyə Güləş Federasiyasına da təşəkkür edirəm”.


Tarakanov koronavirus pandemiyası üzündən bu il keçiriləcək Tokio Yay Olimpiya Oyunlarında hədəflərinin ən azı bir qızıl medal olduğunu deyib:

“Yunan-Roma güləşində 6 çəkidə mübarizə baş tutacaq. Olimpiadaya qatılan idmançıların hamısı medal qazanmaq istəyir. Bütün çəkilərdə təmsil olunmaq istəyirik. Əlbəttə, bir yığmanın 6 çəkinin hamısında güləşçisinin olması çox çətindi. Lakin təsadüfən ola bilər. Qarşıdakı turnirlərdə idmançılarımızın durumuna baxacağıq. Olimpiadada bütün çəkilərdə təmsil olunmaq əla olardı. Ancaq bizim üçün önəmli olan 1 qızıl medal qazanmaqdı. Həmin “qızıl” üçün çox çalışacağıq”.


Türkiyə yığması ilə hazırlıq prosesi yanvarın 16-da başa çatacaq. Komandamız toplanışdan sonra Fransanın Nitsa şəhərində keçiriləcək Henri Deqlan "Qran-pri"sinə qatılacaq.
Football-plus.az Məlumatlardan yararlandıqda istinad vacibdi. ✔ Məlumatlardan internet səhifələrində yararlanarkən müvafiq keçidin qoyulması vacibdi.