“Neftçi” təlim-məşq toplanışı çərçivəsində ilk yoxlama oyununu keçirdi. Flaqman yanvarın 10-da əzəli rəqiblərindən "Kəpəz”lə qarşılaşdı. "Türk Hava Yolları Futbol Mərkəzi”ndə baş tutan qarşılaşma “ağ-qaralar”ın rəsmi internet kanalı vasitəsi ilə canlı yayınlandı. Yoxlama xarakterli matçda “Neftçi” bütün futbolçularını sınadı. “Kəpəz” isə 1-ci divizionda çıxış etdiyi heyətlə meydanda oldu.
"Neftçi”: 30. Aqil Məmmədov, 4. Rener Alves, 6. Voislav Stankoviç, 8. Emin Mahmudov (k), 17. Bruno Teluşi, 20. Mərt Çelik, 22. Mirabdulla Abbasov, 37. Vüsal Əsgərov, 56. Elton Əlibəyli, 72. Emin Zamanov, 91.Tallison Dias.
Ehtiyat oyunçular: 1. Səlahət Ağayev, 12. Kamran İbrahimov, 3. Mamadu Mboc, 5. Anton Krivotsyuk, 7. Namiq Ələsgərov, 10. Saman Nərimancahan, 19. Fəhmin Muradbəyli, 26. Ömər Buludov, 36. Mamadu Kane, 44. Seymur Əliyev, 70. Asim Əlizadə, 80. İsmayıl Zülfüqarlı.
“Kəpəz”: 1. Elməddin Sultanov, 4. Qaraxan Əliyev, 15. Nodar Məmmədov, 7. Ruslan Süleymanov, 17. Ümid Səmədov, 21. Novruz Məmmədov, 10. Əli Səmədov (k), 77. Samir Qurbanov, 14. Nicat Məmmədov, 9. Tural Qürbətov, 11. Elcan Rəhimov.
Ehtiyat oyunçular: 22. Pərvin Qafarov, 18. Röyal Əhmədov, 13. Sadiq Şəfiyev, 20. Orxan Abdullayev, 19. Fərid Məmmədov, 8. Zahid Mərdanov.
“Neftçi”nin ilk yoxlama oyunu gözlənilən qədər də asan keçmədi. Düzdü, Samir Abasov həyətdə kifayət qədər eksperiment etmişdi. Birinci divizion təmsilçisi də müdafiədə sıx oyunla diqqəti çəkirdi. İlk təhlükəli vəziyyəti “Neftçi” yaratdı. Gənc yarımmüdafiəçi Vüsal Əsgərov Mirabdulla Abbasovun ötürməsini dəqiq zərbə ilə tamamlaya bilmədi. “Kəpəz” bunun cavabını tezliklə verdi. 11-ci dəqiqədə gəncəlilərin yerinə yetirdiyi cərimə zərbəsinin qarşısını almaq Aqil Məmmədov üçün asan oldu. 17-ci dəqiqədə mərkəzdə top itirən “sarı-göylər”i Mirabdulla cəzalandıra bilərdi. Lakin əks-hücum zamanı Qaraxan Əliyev qaydanı pozdu. Oyunun hakimi Rauf Allahverdiyev futbolçunu sarı vərəqə ilə cəzalandırdı. Topun arxasında keçən Mirabdullanın zərbəsi “canlı sədd”i keçmədi. İlk yarı, demək olar ki, flaqmanın üstünlüyü şəraitində keçdi. Lakin gəncəlilərin qolkiperi və müdafiəçilər hesabın açılmasına imkan vermədilər.
Fasilədən sonra “Neftçi” meydana tam fərqli heyətlə çıxdı. Buna baxmayaraq, ikinci hissəyə “Kəpəz” daha istəkli başladı. İlk 10 dəqiqədə topa daha çox nəzarət edən tərəf məhz gəncəlilər oldu. Bundan sonra üstünlüyü Samir Abasovun yetirmələri ələ almağa başladı. 59-cu dəqiqədə sol cinahda qapıçını da keçən Namiq Ələsgərov topu Asim Əlizadəyə ötürdü. Sonuncunun zərbəsi qapının üstündən keçdi. 64-cü dəqiqədə Ələsgərov yenidən diqqət mərkəzinə düşdü. Onun cərimə zərbəsindən sonra qapıçı baxımlı qurtarışla yadda qaldı. Son 15 dəqiqədə “Neftçi” təşəbbüşü tam ələ almışdı. Namiq tez-tez “Kəpəz”in müdafiəçilərinə başağrı olurdu. O, 3-4 rəqibini geridə qoyduqdan sonra topu Krivotsyuka ötürdü. Müdafiəçi də öz növbəsində topu saxlamadan Nərimancahana yönəltdi. Sonuncunun zərbəsi dəqiq olmadı. “Neftçi” istəyinə 78-ci dəqiqədə çatdı. Namiq iki rəqibi arxada qoyaraq təxminən 28 metrdən topu “doqquzluğ”a göndərdi. Qoldan sonra “Kəpəz” təşəbbüsü ələ almağa çalışsa da, hesabı bərabərləşdirə bilmədi. Flaqmanın gənc futbolçularından Asim 87-ci dəqiqədə sağ cinahda 2 rəqibi geridə qoyub, qapıçı ilə üzbəüz qalsa da, zərbəsi dəqiq olmadı. Beləliklə, “Neftçi” divizion təmsilçisini çətinliklə üstələdi. Ümumilikdə isə matç gənc futbolçuları sınamaq baxımından bakılılar üçün faydalı oldu. Gəncəlilər isə yaxşı müdafiə olunaraq premyer-liqaya layiq olduğunu nümayış etdirdi. Yaşar Vahabzadə komandasını daha da gücləndirməlidi.
Samir Abasov "Kəpəz”lə oyundan sonra "Neftçi” TV-yə danışıb:
"Bu gün nəticə önəmli deyildi. Həm komanda, həm də fərdi olaraq futbolçulara tapşırıqlar verilmişdi. Əsas məqsəd futbolçuların həmin tapşırıqları yorğun halda nə dərəcədə yerinə yetirəcəklərini görmək idi. Həm razı, həm də narazı qaldığım məqamlar oldu. Yeri gəlmişkən, təklfimizi qəbul edib, bizə görə o qədər yol gəldikləri üçün "Kəpəz”in məşqçi heyətinə və rəhbərliyinə minnətdarıq”.
Təcrübəli mütəxəssis "Neftçi-2”dən cəlb olunan gənc futbolçulardan razı qalıb:
"Çox istəkliydilər. Səhvləri də başadüşüləndi. Həyəcanlıydılar, özlərini göstərmək istəyirdilər. Nəinki burda, məşqlərdə də onlar bizi razı salır”.
Abasov təlim-məşq toplanışı haqda da danışıb:
"Toplanış qaydasında davam edir. Heç bir problem yaşamamışıq. Sadəcə, Sabir Buqrin dünənki məşqdə yüngül zədə aldı deyə, bu gün yox idi. Bununla belə, toplanışdan və hazırlıq prosesində futbolçuların yerinə yetirdiklərindən razıyıq. Legionerlərin gec qoşulmasında heş bir problem yoxdu. Özümüz icazə vermişdik. Həmin müddətdə verdiyimiz proqramdan istifadə ediblər. Artıq fərdi yox, komanda şəklində məşq edirik”.
İLKİN SULTANLI
