Sizin reklam burada

Elxan Məmmədov TFF rəhbərliyi ilə nəyi müzakirə edib?

Müəllif: football Tarix: 1-12-2020, 15:01 117 Baxış

“İki ölkə futbolçularının legioner statusunda oynamamaları üçün danışıqlarımız davam edir”
AFFA-nın icraçı vitse-prezidenti Elxan Məmmədov noyabrın 25-də İstanbulda Türkiyə Futbol Federasiyasının (TFF) rəhbərliyi ilə görüşüb. Qəzetimizin ötən sayında xəbər verdiyimiz kimi, TFF-nin prezidenti Nihat Özdəmir, birinci vitse-prezident Sərvət Yardımcı və baş katib Kadir Kardaşın iştirak etdiyi görüşdə Məmmədov “Qarabağ”ın Avropa Liqasının qrup mərhələsindəki ev oyunlarının İstanbulda keçirilməsinə şərait yaradılmasına və milli komandamızın Millətlər Liqasında ev oyunları üçün TFF tərəfindən eyni təklifin verilməsinə görə AFFA-nın prezidenti Rövnəq Abdullayevin adından təşəkkürünü bildirib. AFFA və TFF arasında qarşılıqlı əməkdaşlığın daha da inkişaf etdirilməsi, xüsusilə Türkiyə superliqasındakı təcrübə nəzərə alınaraq Azərbaycan premyer-liqasında VAR sisteminin tətbiqi ilə bağlı ətraflı müzakirə aparılıb.
Elxan Məmmədov Türkiyə mətbuatına görüşün detalları haqda açıqlama verib: “Hazırda çempionatımızda iki türkiyəli futbolçu çıxış edir. "İstanbul BŞ"dən icarə əsasında "Neftçi"yə keçən Mərt Çəlik Azərbaycan vətəndaşlığını alandan sonra milli komandalarda çıxış etməyə başladı. U-21-in heyətində qısa vaxtda olduqca uğurlu oyun nümayiş etdirdi və əsas yığmanın baş məşqçisi Canni De Byazinin diqqətini çəkdi. Çelik yaxın vaxtlarda əsas komandanın əvəzolunmaz oyunçusu ola bilər. Ozan Can Kökçü isə "Sabah"ın formasını geyir. Türkiyədə yetişmiş futbolçuları çempionatımızda daha çox görmək istəyirik. Bu səbəbdən son zamanlar AFFA və TFF olaraq, iki ölkə futbolçularının legioner statusunda oynamamaları üçün danışıqlarımız davam edir”.
Məmmədov Avropa çempionatının A qrupunun oyunları ilə bağlı da danışıb. O, evsahibliyinin Bakıdan və Rusiyanın Sankt-Peterburq şəhərindən alınacağına dair xəbərlərə də münasibət bildirib: “Ev sahibi kimi qardaş ölkəni Bakıda görməkdən məmnun olacağıq. AFFA olaraq, bütün işlərimizi bu istiqamətdə görürük. Türkiyə yığması burda öz evindəki kimi Uels və İsveçrəyə qarşı oynaya bilər. Amma hansısa format dəyişikliyi ilə bağlı yeni rəsmi məlumat yoxdu. Məsələ ilə bağlı yekun qərar UEFA İcraiyyə Komitəsinə aiddi. Qurum hansısa dəyişiklik etməyə qərar versə, AFFA olaraq buna hörmət edəcəyik".
SON XƏBƏRLƏR