Srağagün ölkə kubokunun yeni mövsümünün püşkü atıldı. Bildiyiniz kimi, mükafat uğrunda elitanın 8 komandası ilə yanaşı, 1-ci divizion təmsilçilərindən “Turan Tovuz”, “Zaqatala”, “Kəpəz” və “Qaradağ Lökbatan” da mübarizə aparacaq. Püşkün nəticəsinə əsasən “Sabah” 1/8 finalda “Kəpəz”ə, “Qəbələ” “Turan Tovuz”a rəqib olub. “Zirə” bu mərhələdə “Qaradağ Lökbatan”la, “Səbail” isə “Zaqatala” ilə qarşılaşacaq.
Püşklə bağlı fikirlərini öyrənmək üçün 1-ci divizion təmsilçilərinin baş məşqçiləri ilə əlaqə saxladıq. “Qaradağ Lökbatan”ın çalışdırıcısı Nazim Əliyev “Zirə”ni güclü rəqib sayır: “Düzü, rəqibimiz çox güclü komandadı. Sevindirici hal odu ki, turnirdə 1-ci divizion futbolçuları da diqqət mərkəzində olacaq. İstəyərdik ki, bizim futbolçuları da özünü göstərsin və elita klublarına cəlb olunsunlar. Bu, onlar üçün böyük şansdı, amma mərhələ keçmək bizim üçün çətin olar. Rəqiblə səviyyə fərqimiz bəllidi”.
“Turan Tovuz”un baş məşqçisi İlham Yadullayev də “Qəbələ” ilə oyunun çətin olacağını vurğuladı: “Rəqib premyer-liqanın adlı-sanlı komandasıdı. Sadəcə, bu gün bəxtsizliyə görə turnir cədvəlinin sonlarında qərarlaşıb. Bəzi oyunlarda yaxşı oynasalar da, qələbə qazana bilməyiblər. Yaxşı komandadı, yaxşı heyəti var. Bu oyunlar futbolçularım üçün ikiqat məsuliyyətli olacaq. Onlar daha motivasiyalı hazırlaşacaqlar. Ümid edirəm ki, bu fürsəti dəyərləndirə biləcəyik”.
AYGÜL