Hesabat turunun ilk oyununda tunir cədvəlində qonşu olan komandalar üz-üzə gəldi. Cari mövsümdə premyer-liqanın ən “sülhsevər” komandası olan “Qəbələ” “doğma divarlar” arasında 7-ci pillədə qərarlaşan “Səbail”i qonaq edirdi. Meydan sahibləri bu qarşılaşmadan qələbə ilə ayrılacağı təqdirdə ən azı “dənizçilər”lə yerini dəyişəcəkdi. Ancaq Elmar Baxşıyevin yetirmələri dövrənin son görüşündə də qələbəyə həsrət qaldılar. “Qırmızı-qaralar” matçda hesabı açan tərəf olsa da, Aftandil Hacıyevin çalışdırdığı komanda özündə güc taparaq “status-kvo”nu bərpa etməyi bacardı və səfərdən 1 xalla döndü.
Turun maraqla gözlənilən oyunlarından biri “ASK Arena”da keçirildi. “Qarabağ”la heç-heçədən sonra “biz çempionluğa oynayırıq” söyləyən Yunis Hüseynovun komandası doğma tribunalar qarşısında son vaxtlar kəskin tənqid atəşinə tutulan, ancaq həlledici anlarda toparlanmağı bacaran “Neftçi”ni qonaq etdi. Matçın süni örtüklü meydanda keçirilməsi meydan sahiblərinin xeyrinə işləyən amil kimi dəyərləndirmək olardı. Ancaq “qırmızı-ağlar” bu üstünlükdən də yararlanmağı bacarmadılar. Matçın taleyini isə bir qol həll etdi. Namiq Ələsgərov sona 22 dəqiqə qalmış fərqlənməklə komandasının ilk dövrəni ikinci pillədə başa vurmasına yardımçı oldu. “Keşlə” isə turdan-tura geriləməkdə davam edir. 7 turdan sonra Hüseynovun komandası “Qarabağ”la eyni xala malik olsa da, artıq turnir cədvəlində 4-cü yox, 5-ci pillədə qərarlaşıb.
Masazırdakı “Bank Respublika Arena”da “Sabah” “Sumqayıt”ı qonaq etdi. Son 3 turda məğlubiyyət acısı yaşayan “tələbələr” ötən tur liderliyə yüksələn “kimyaçılar”la matçda uğursuzluğa nöqtə qoyub, yenidən “üçlüy”ə düşmək üçün geridönüş etməyi planlaşdırırdı. Ancaq necə deyərlər, “sən saydığını say, gör sumqayıtlılar nə sayır”. Tarixində ilk dəfə dövrəni lider kimi başa vurmaq şansı olan “kimyaçılar” bu fürsəti qaçırmadılar. Büdcələri müqayisə gəlməyəcək iki komandanın qarşıdurmasında “tələbələr”in yanında “kasıb” komanda təsiri bağışlayan “Sumqayıt” Visente Qomesin çalışdırdığı kollektivə son saniyələrdə “tərs sillə” vurmaqla meydanda böyük pulların heç də hər şeyi həll etmədiyini göstərdi.
Zirədə baş tutan görüş isə müəllim - tələbə qarşıdurması kimi maraqlı idi. Uzun illər Qurban Qurbanovun rəhbərliyi altında oynayan Rəşad Sadıqov ilk dəfə baş məşqçi kimi müəllimi qarşısında imtahan verirdi. Görüş yetərincə maraqlı alındı. İlk yarıda “Zirə” bir qədər fəal təsir bağışlasa da, fasilədən sonra “köhlən atlar” - baxmayaraq ki, əsas vaxtın son 20 dəqiqəsini azlıqda oynamaq məcburiyyətindəydilər - təşəbbüsə yiyələndi. Rahil Məmmədov cari mövsümdə debüt oynunda meydandan qovulmaqla yadda qaldı. “Qartallar” “köhlən atlar”la qarşıdurmuda zəif görünməsələr də, qonaqların bəxtinin gətirmədiyini vurğulamaq lazımdı. “Qarabağ”ın futbolçuları bir neçə epizodda son nöqtəni qoymaqda çətinlik çəkdilər. Bu üzdən Rəşad Sadıqovun müəllimi ilə ilk imtahandan üzüağ çıxdığını söyləmək mümkündü. Əslində bu heç-heçə nə qonaqların, nə də meydan sahiblərinin işinə yaradı. Ötən turu ikinci pillədə başa vuran qəsəbə təmsilçisi “sülh”ə razılaşmaqla mövqeyini “Neftçi”yə təhvil verdi. “Sumqayıt”la aralarında xal fərqi isə 3-ə çatdı. “Köhlən atlar” qələbə qazanacağı halda ilk “üçlüy”ə daxil ola bilərdi ki, bu imkan qaçırıldı. Bu yerdə onu vurğulayaq ki, “Zirə”nin futbolçusu Cəlal Hüseynov “Qarabağ”la görüşdə premyer-liqada debüt edib. Cəlal “qartallar”ın tarixində elitada meydana çıxan ən gənc futbolçudu. O, 17 yaş 9 ay 23 günlüyündə rekorda imza atıb. Buna qədər isə rekord 19 yaş 4 ay 12 günlüyündə premyer-liqa oyununda iştirak edən Rafael Məhərrəmliyə məxsus idi. Onu da qeyd edək ki, bunadək ölkə kubokunda forma geymiş Hüseynov klub tarixinin mütləq rekordçudu. O, 16 yaş 11 ay 1 günlüyündə rəsmi matça çıxıb.
Azərbaycan premyer-liqası
1-ci dövrə, 7-ci tur
24 oktyabr
Qəbələ - Səbail 1:1
Keşlə - Neftçi 0:1
25 oktyabr
Sabah – Sumqayıt 1:2
Zirə - Qarabağ 0:0
1. Sumqayıt 7 4 2 1 11-7 14
2. Neftçi 7 4 1 2 7-6 13
3. Zirə 7 3 2 2 8-8 11
4. Qarabağ 6 2 3 1 8-4 9
5. Keşlə 7 2 3 2 6-5 9
6. Sabah 7 2 0 5 7-9 6
7. Səbail 7 1 2 3 7-9 5
8. Qəbələ 7 0 5 2 4-10 5
Bombardilər: Əli Qurbani (Sumqayıt) – 6, Namiq Ələsgərov (Neftçi) – 5, Davit Volkov (Zirə) – 4.
Növbəti turun oyunları: 31 oktyabr - Qəbələ - Sabah, Zirə - Səbail; 1 noyabr – Sumqayıt – Neftçi, Qarabağ – Keşlə.
RƏŞAD