Sizin reklam burada

Tural Bayramlı evlərinin darvazasından bayraq asacaq

Baxış Sayı:85

Tural Bayramlı evlərinin darvazasından bayraq asacaq

“Atamla əmim həmişə rayonumuz, kəndimiz haqda maraqlı söhbətlər edirdi”
Srağagün Azərbaycan ordusunun işğaldan azad etdiyi şəhərlər sırasına Qubadlı da qoşuldu. Prezidentin “tvitter” hesabında açıqladığı xəbərdən sonra ölkə əhalisi sevincə qərq oldu. Ən çox sevinənlərdən biri də “Zirə”nin oyunçusu Tural Bayramlı idi. Əslən Qubadlıdan olan 22 yaşlı yarımmüdafiəçi Sumqayıtda doğulub. Onunla doğma torpaqlarının işğaldan azad olunması haqda söhbətləşdik.
- Tural, səni təbrik edirəm. Qubadlı şəhəri və bir sıra kəndləri düşmən işğalından azad olundu.
- Təşəkkür edirəm. Çox sağ olun. Allah bütün əsgərlərimizi qorusun ki, bizə bu sevinci yaşatdılar.
- Doğma yurdunun düşmən işğalından qurtulması ilə bağlı təəssüratını bilmək maraqlı olardı...
- Xəbəri eşidəndə həqiqətən də çox sevindim. Ən böyük arzularımdan biri Qubadlıya getməkdi. Allah arzuma çatdırsın. İnşallah, tək Qubadlının yox, Qarabağın bütövlüklə işğaldan azad olunmasını qeyd edək. Onda əsl toy-bayram edərik.
- Qubadlının harasındansan və doğma yurdun haqda nələri bilirsən?
- Mahmudlu kəndindənəm. Sumqayıtda doğulmuşam. Heyf, oraları görməmişəm. Bu səbəbdən də çox şey deyə bilmərəm. Amma bilirəm ki, dünyanın ən gözəl yerlərindən biridi Qubadlı. Ora getməyi həqiqətən çox arzulayıram. Bu istəyimi sözlə ifadə edə bilmərəm.
- Validenlərin sənə Qubadlı haqda hansısa xatirələrini danışıblar?
- Atamla əmim həmişə rayonumuz, kəndimiz haqda maraqlı söhbətlər edirdi. Bəzən Qubadlını xəyal edirdim. Elə bilirdim ki, cənnətdi. Mütləq gedəcəm öz kəndimizə. Qubadlıya qayıdanda evimizin darvazasından üçrəngli bayrağımızı asacam.
- Bizə xoş anlar yaşadan əsgərlərimiz haqda nə deyə bilərsən?
- Allah onlardan razı olsun. Çoxusu mənimlə yaşıd qardaşlardı. Onlar qəhrəmandan da üstündüdülər. Qorxmadan, çəkinmədən torpaqlarımız uğrunda canlarından keçirlər. Mən onlarla fəxr edirəm. Şəhidlərimizin ruhu qarşısında baş əyirəm.
İLKİN SULTANLI

Oxşar xəbərlər
SON XƏBƏRLƏR