Sizin reklam burada

Yunuszadə 10-12 günə Şimali Makedoniyaya qayıdacaq

Baxış Sayı:130


“Ümit Karanın məni tanımamasını normal qəbul etmək lazımdı”
Elvin Yunuszadənən karyerasını ölkə xaricində davam etdirməsindən xəbəriniz var. Bir daha xatırladaq ki, müdafiəçi hazırda Şimaliya Makedoniya təmsilçisi “Şkupi”nin şərəfini qoruyur. Yayda adı çəkilən klubla anlaşan Elvin ilk vaxtlar əsas heyətdə yer almasa da, son turlarda məşqçilər korpusu ona etimad göstərirdi ki, o da etibarlı oyunu ilə ümidləri doğruldurdu.
Təəssüf ki, yersiz zədə Yunuszadəni növbəti dəfə bir müddət yaşıl meydanlardan kənarda qoyacaq. Müdafiəçi məşqdə zədələndiyindən üç həftə topa toxuna bilməyəcək. Hazırda Bakıda olan futbolçu qəzetimizə açıqlamasında həkim nəzarəti altında olduğunu bildirdi: “Son tur ərəfəsində komanda ilə məşqə çıxmışdım. Bilirsiz ki, “Şkupi”də baş məşqçi dəyişikliyi oldu və “sükan arxasına” tükiyəli mütəxəssis Ümit Karan dəvət olundu. Onun rəhbərliyi altında 3-cü məşqə çıxmışdım. Özü də bizimlə “kvadrat” oynayanda ayağım burxuldu. Həkimlər ilkin müayinə zamanı 10 gün məşq edə bilməyəcəyimi dedilər. Zədənin ağırlığını nəzərə alıb qərar verdim ki, Bakıya qayıdım və tanış həkimlərin nəzarəti altında müalicəmi davam etdirim. Bağlarda problem var. İnşallah, 10-12 günə yenidən Şimali Makedoniyaya qayıtmağı planlaşdırmışam. Həkimlərin dediklərinə əsasən 3 həftədən sonra kollektivlə birgə məşqlərdə iştirak edə bilərəm. Bilmirəm, şanssızlıqdı, yoxsa bəxt məndən üz döndərib? Optimal formaya düşdüyüm anda yenə 20 gün futboldan kənarda qalmaq məcburiyyətindəyəm. Ayağım burxulmamışdan öncə oyunda başım yarılmışdı. Həkimlər elə matç gedə-gedə başıma tikiş qoydular və 90 dəqiqəni başa vurdum. Ümid edirəm ki, hər şey yaxşı olacaq və yenidən əsas heyətdə oynayacam”.
Elvinlə söhbətdə Ümit Karanın onunla bağlı mətbuata söylədiyi fikirləri xatırlatdıq. Türk mütəxəssis açıqlamasında Yunuszadəni tanımadığını və zədədən sonra geriyə dönüb-dönməyəcəyindən xəbərsiz olduğunu bildirib. Elvin “Şkupi”nin yeni çalışdırıcısının fikirlərinə belə münasibət bildirdi: “Karan yeni təyin olunub və hələ komandanı bir dəfə də olsun, rəsmi matçda meydana çıxarmayıb. Yuxarıda qeyd etdiyim kimi, cəmi iki məşqində iştirak etdim, üçüncüdə zədələndim. Onun məni tanımamasını normal qəbul etmək lazımdı. Komandada belə bir futbolçunun olduğundan xəbərdardı, ancaq məni iş başında görməyib. O ki qaldı geri dönməyimə, bəli, qeyd etdiyim kimi, 10-12 günə ora yollanacam. Fikrim var ən azı dekabra kimi “Şkupi”nin şərəfini qoruyum. Onsuz da bu il pandemiya səbəbindən uzun müddət futboldan uzaq düşmüşəm. Mövsümün ilk yarısında Şimali Makedoniya təmsilçisində oynayıb formamı qorumaq istəyirəm. Ordan isə daha güclü çempionatlardan birinə yollanmağı planlaşdırmışam. “Şkupi” bu yöndə mənə tramplin ola bilər. Şimali Makedoniya çempionatı daim skautların maraq dairəsindədi. Hər oyunda onları görmək mümkündü”.
RƏŞAD

Oxşar xəbərlər
SON XƏBƏRLƏR