“Makkabi” ağdamlılara oyuna itkilərlə hazırlaşır“Qarabağ” sabah ölkəni tərk edəcək. Avroliqanın qrup mərhələsində ilk oyununu keçirəcək “köhlən atlar”ın yolu İsrailədi. Oktyabrın 22-də “Makkabi” ilə qarşılaşacaq Azərbaycan çempionu sabah səhər 11 radələrində havaya qalxacaq.
Komandanın səfərə tam tərkibdə yollanması nəzərdə tutulub. Belə ki, zədədən əziyyət çəkən Mahir Emreli, Maksim Medvedev, eləcə də Rahil Məmmədov təyyarədə yol yoldaşı olacaqlar. Rahilin meydana çıxacağı inandırıcı görünməsə də, Mahirlə Maksimin cüzi şansı var. “Qəbələ”ylə matçın ertəsi futbolçular ənənəyə uyğun olaraq bərpa məşqi keçib. Yəni yaşıl meydanda kollektiv məşq olmayıb. Dünən isə komanda tam tərkibdə səfəröncəsi koronavirus testi verib. Odu ki, yığma üzvlərinin kollektiv çalışmalara nə dərəcədə hazır olduqları bilinmir. Mahirdə hər şey yaxşılığa doğru getməkdədi. Maksim isə yığmanın Monteneqro ilə görüşündə zədələndikdən sonra müalicə alır. Bir sözlə, “Makkabi” ilə oyunda start heyətində yer alacaqları inandırıcı deyil. Ən yaxşı halda qarşılaşmanın gedişində mübarizəyə qoşula bilərlər. Təbii ki, həmin vaxt durumları imkan versə.
“Makkabi” də oyuna tam heyətlə hazırlaşa bilmir. Yığmadan qayıdan futbolçular hələ də İsrail təmsilçisində fərdi məşqlərlə kifayətlənirlər. Klub rəhbərliyi koronavirus pandemiyası ilə bağlı təhlükəsizlik tədbirləri almaq üçün bu addıma əl atıb. İsrail millisinin son toplanışına cəlb olunan Eytan Tibi, Şeran Yeini, Maor Kandil, Eyal Qolasa və Eden Karzev koronavirus testi veriblər. Nəticə bəlli olandan sonra oyunçular kollektivlə birgə məşqlərə qoşula biləcəklər. Baş məşqçi Giorqos Donis onların, heç olmasa, oyunöncəsi son iki məşqdə iştirak etməsini istəyir.
“Qarabağ”ın Avroliqadakı rəqiblərindən olan “Sivasspor” da ciddi itki ilə üzləşib. Türkiyə klubunun rəsmi saytında bildirilir ki, yarımmüdafiəçi Ərdoğan Yeşilyurt superliqanın 5-ci turunun "Kayserispor"la səfər oyununda zədələnib. Topuğundan xəsarət alan 27 yaşlı futbolçu üç həftə meydana çıxa bilməyəcək. Bu isə o deməkdi ki, o, Avroliqanın qrup mərhələsinin 3-cü turunda noyabrın 5-də "Qarabağ"la keçiriləcək görüşü buraxacaq.
HƏBİB
