Sizin reklam burada

Ucuzlaşmayaq

Baxış Sayı:737

Arda Turanla Fatih Terimin “Futbol+”in əməkdaşının zənginə və mesajına cavab verməməsini normal qəbul etməliyəm yox, etməkdə borcluyam. Hər ikisi Türkiyə futbolunun rəmzlərindən sayılır, adları dillər əzbəridi, hələm-hələm kamera və mikrofon qarşısına keçmirlər. Keflərinin cağ vaxtına düşə gərək. Onu da kimdi gözləyən? Xülasə Turanla Terim dünənki zənglərimə cavab verməyi lazım bilmədilər.
Elə bunu demişdim ki, kollektivimizin yeni əməkdaşı İlkin dilləndi: “sizə Arda cavab vermir. Mən ki türk həmkarlarımızla danışmaqda çətinlik çəkirəm. Bir neçəsinə yazmışam, ikisindən səs çıxdı. Çalışdıqları qurumla əməkdaşlıq etdiklərinə görə başqa mətbu orqana açıqlama vermək ixtiyarlarının olmadığını dedilər”.
Yalan deyiblər, həm də gözlərinin içinə qədər. Adamların içində sadiqlik, özününkünü başqasına satmamaq hissi var və ona sadiqlik nümayiş etdiriblər. Bəli, sən-mən onlar üçün başqasıyıq. Dillərdə hər nə qədər qardaşlıq nəğmələrinin sözləri gəzsə də, işin içi tam başqadı. 100 türkdən 90-nı səni-məni başqası gözündə görür, özünü bizdən üstün tutur, yeri gələndə yerimizin hara olduğunu göstərir. Millət ayrı-seçkiliyi aparmaq niyyətində deyiləm. Əzizlərim Türkiyədə yaşayır, özümün də bir ayağım ordadı. Əksinə, özləri özlərinə qiymət verdikləri üçün onları alqışlayıram.
Sözüm bizimkilərədi. Sizə qurban olum, başınıza dönüm, lazım gəlsə, ayağınızın altında ölüm, “Qalatasaray” sevdasını, Türkiyə futboluna, nə bilim, futbolçusuna, daha nəyinə olan sevginizi bir müddət kənara qoyun. Dəyərli jurnalistlər, Türkiyədən zəng gələndə “əriməyin”. Dəyərli klub rəsmiləri, türk jurnalist əlaqə saxlayanda öz dilimizdə danışın. Dəyərli azarkeşlər, sosial şəbəkələrdə müzakirələr aparanda “Qalatasaray” sevginizi kənara qoyun.
“Neftçi”ni sevməyə bilərsiz. Sevməyin, öz işinizdi. Amma “Qalatasaray” aşiqi olduğunuzu da bu dərəcədə onlara bildirməyin. Arda Turanla Fatih Terim zəngimizi cavabsız qoyursa, türk jurnalist sonra başı ağrımasın deyə azərbaycanlı həmkarına “Qalatasaray” haqda danışmaq istəmirsə, biz niyə əldən-ayaqdan getməliyik? Niyə qarşılarında ucuzlaşmalıyıq? Türk dilində danışa bilməyən qarşı tərəf başa düşsün deyə, özünü niyə gülünc vəziyyətə salmalıdı? Danışma da, a kişi. Nə məcburdu? Sən öz dilində danış, qoy o səni başa düşməyə çalışsın.
Onsuz da dünyanın hər yerində özümüzü ucuz tutmuşuq və tutmaqda davam edirik. Heç olmasa, evimizin içində ucuzlaşmayaq.

Oxşar xəbərlər
SON XƏBƏRLƏR