“Mançester Siti”nin baş məşqçisi Xosep Qvardiola İngiltərə çempionatının yeni mövsümünün ilk matçlarında komandasının başında olmaya bilər.

Futbol+ xəbər verir ki, MS premyer-liqanın yeni mövsümündə ilk oyununu sentyabrın 21-də “Vulverhempton”a qarşı keçirəcək. İspaniyalı mütəxəssis vətənində dincəldiyi üçün İngiltərəyə qayıdan zaman 14 gün müddətində karantində olmalıdı. Hazırda Barselonada istirahətdə olan 49 yaşlı çalışdırıcı Kataloniya bölgəsindəki yaxınlarını ziyarət edir. Yeri gəlmişkən, dünya mediasında Qvardiolanın “Barselona”dan Lionel Messinin transferi üçün argentinalı hücumçu ilə eyniadlı şəhərdə görüş təyin etməsi ilə bağlı xəbərlər yayılıb.

Onu da əlavə edək ki, son mövsümü qənaətbəxş başa vurmasa da İngiltərə klubu Qvardiola ilə yeni müqavilə üzrə danışıqlara başlayıb. Yerli mənbələr rəhbərliyin 49 yaşlı mütəxəssislə 2021-ci ilin iyununa qədər nəzərdə tutulan müqavilənin müddətini daha bir il uzatmaq istədiyini xəbər verir. Qeyd edək ki, Qvardiola “şəhərlilər”i 2016-ci ildən çalışdırır. Komanda onun rəhbərliyi altında iki dəfə (2017/18, 2018/19) ölkə çempionu olub, eyni zamanda ölkə kubokunu (2018/19) və Superkubokunu (2018, 2019) qazanıb.