Zlatan İbrahimoviçin yeni mövsümə “Milan”da başlayacağı məlumatını vermişdik.Futbol+ xəbər verir ki, tərəflər müddəti avqustun sonunda başa çatan müqaviləni yeniləyiblər.
Məlumatı klubunun mətbuat xidməti yayıb. İtaliya nəhənginin sosial şəbəkə hesablarında “Zlatan qayıtdı” başlığı ilə paylaşım edilib. Yerli mənbələr isveçli futbolçunun yeni sözləşməsinin birillik müddətə nəzərdə tutulduğunu xəbər verib.
Qeyd edək ki, klub uzun müddət idi 38 yaşlı hücumçu ilə müqaviləni yeniləmək üçün danışıq aparırdı. Rəhbərlik maddi səbəblərə görə onunla razılığa gələ bilmirdi.
“Milan”a bu ilin yanvarında “Los Anceles Qalaksi”dən keçən İbrahimoviç daha əvvəl qırmızı-qara formanı 2010-12-ci illərdə daşıyıb. O, komandada qalmasının rəsmiləşməsini belə şərh edib:
Nəhayət, bütün detallar həll edildi və özümü evimdəki kimi hiss etdiyim yerə qayıda bilərəm. İndi qarşıda ağır işlərimiz var. Çox məşq etməliyik. Həmişə dediyim kimi, mən buraya maskot olmaq üçün gəlməmişəm. Nəticə vermək, komandaya və məşqçiyə kömək etmək, həmçinin “Milan”ı layiq olduğu yerdə görmək üçün burdayam. Ötən mövsümün ikinci yarısından yaxşı çıxış etməyə başladıq. Lakin heç bir kubok qazanmadıq. Yeni mövsümə “Milan”la birlikdə başlayacağam. Qalib gəlmək üçün bir neçə ay əvvəl başladığımız işləri davam etdirməliyik. Səylə məşq etməli və meydanda bütün gücümüzü ortaya qoymalıyıq. Bütün azarkeşləri salamlayıram. Ümid edirəm ki, tezliklə stadiona qayıdıb bizim yanımızda olacaqlar. Çünki onların dəstəyinizə ehtiyacımız var. Birlikdə “San Siro”da səs-küy yaratmalıyıq.
